“ჩვენ გვაქვს ყველაზე სამწუხარო ინფორმაცია, რომ ნაცემი ბავშვი ჯერ ჩაახრჩეს ადგილზე ძალადობის გამოყენებით და მერე გაატანეს წყალს.“– ეს განცხადება გარდაცვილი გიორგი შაქარაშვილის ბიძამ, მირიან ნიკოლაშვილმა გააკეთა. გარდაცვლილის ბიძა ამბობს, რომ გიორგის დაზიანებები დაცემის და დაგორების დაშედეგად ვერ მიადგებოდა და ამ გზით ვერც წყალში აღმოჩნდებოდა, რადგან დაღმართის დასრულების შემდეგ, რომელიც სავარაუდოდ მან ჩაირბინა, მდინარემდე საკმაოდ დიდი ადგილია. ის თვლის, რომ გიორგი შაქარაშვილი სასტიკად ცემეს, შემდეგ კი წყალში დაახრჩეს და წყლის ნაკადს გაატანეს. დაზიანებები კი მას ცემის შედეგად აქვს მიყენებული.
“ბავშვი ჩამორბენის დროს დაგორებით, წაქცევით ან რაიმე ერთჯერადი ტრავმით ამ დაზიანებებს ვერ მიიღებდა. ჯერ ის სცემეს სასტიკად. ეს დაზიანებები გამორიცხავს, რომ დაგორებიდან მიეღო კომპლექსურად ეს დაზიანებები და წყალშიც ვერ მოხვდებოდა. თუ დაგორდებოდა მდინარის ნაპირიდან ოც მეტრში მოხვდებოდა. გიორგის პანიკური შიში ქონდა მდინარის და თუ სცემდნენ და გაანებებდნენ თავს მას არც მადევარი არ ეყოლებოდა, არც თვითგადარჩენის შეგრძნება არ ექნებოდა და უბრალოდ ალოგიკურია წყლის პანიკური შიშის ბავშვი როგორ უნდა შესულიყო არაგვში. “– ამბობს მირიან ნიკოლაშვილი.
ის ამბობს, რომ ოჯახს აქვს პრეტენზია ტოიოტა ქამრის ექვსივე მგზავრის მიმართ, რომლებიც ბოლოს გაეკიდნენ შაქარაშვილს და მის მეგობრებს. და რომელთა დევნის დაწყების შემდეგ შაქარაშვილი არაგვის ხიდის ქვეშ ტერიტორიიდან გაუჩინარდა.
“პრეტენზია ოჯახის იქნება ექვსივე მათგანის მიმართ თანაბრად. ესენი არიან ვინც გამოეკიდა გიორგის და ვინც განაპირობა მისი სიკვდილი. მაგ ექვსივემ არკვიონ მერე ერთმანეთში ვინ მოკლა ბავშვი.“– ამბობს გარდაცვლილის ბიძა.
ოჯახის პოზიცია კატეგორიული მას შემდეგ გახდა, რაც ცნობილი გახდა ექსპერტიზის დასკვნა, რომლის მიხედვით გიორგი შაქარაშვილის გარდაცვალების მიზეზი ასფიქსია გახდა, თუმცა მას გარდაცვალებამდე სერიოზული დაზიანებები აქვს მიყენებული. 12 დაზიანება თავის და სხეულის სხვადასხვა მიდამოებში : თვალბუდის, ტუჩის მიდამოებში, ზურგში, საზარდულში, ხელზე, მენჯ ბარძაყის არეში აქვს მიყენებული. გარდაცვლილის ბიძა ამბობს, რომ ის ნაცემია და დაგორებით და დაცემით ამ დაზიანებებს ვერ მიიღებდა.
გიორგი შაქარაშვილი 19 ივნისს ღამით გაუჩინარდა მას შემდეგ, რაც მეგობრებთან ერთად მცხეთაში წვეულებიდან წამოსულს თბილისიდან ტოიოტა ქამრის მარკის მანქანით ჩასული ექვსი პირი თავს დაესხა. შაქარაშვილის ცხედარი 4 დღიანი ძებნის შემდეგ მდინარეში იპოვეს.
