ბენზინი მკვეთრად გაძვირდა.როდემდე გაგრძელდება ფასების ზრდა
ბოლო 2 კვირაში ბენზინი თითქმის 15 თეთრით გაძვირდა. სხვადასხვა პროდუქტზე ფასებმა განსხვავებულად მოიმატა: პრემიუმის ფასი დღეს 2 ლარსა და 60 თეთრამდეა, რეგულარის კი 2 ლარი 45 თეთრი.
ექსპერტები საწვავის გაძვირებას საერთაშორისო ბაზარზე ნავთობპროდუქტებზე ფასების მატებას უკავშირებენ და აცხადებენ, რომ არა ბრენდირებულ ბენზინგასამართ სადგურებზე ბენზინის ფასი გაცილებით მაღალია.
„ფასები გაზრდილია საშუალოდ 15 თეთრით ბრენდირებულ გასამართ სადგურებზე. არა ბრენდირებულ გასამართ სადგურებზე ალბათ კიდევ უფრო მეტით არის გაზრდილი. ფასების მატება უკავშირდება იმას, რომ ბოლო თვეების განმავლობაში გლობალურ ბაზრებზე არის საერთაშორისო ფასები მნიშვნელოვნად გაზრდილი ნავთობპროდუქტებზე. და სწორედ ამ გაზრდილი ფასების შედეგი გახლავთ ის, რომ ჩვენთან ფაქტიურად ბოლო თვეების განმავლობაში ფასების კორექტირება მოხდა რამდენჯერმე,“-განაცხადა „ნავთობპროდუქტების იმპორტიორთა კავშირის თავმჯდომარემ“ ვანო მთვრალაშვილმა.
საერთაშორისო ფასების ზრდაზე საუბრობს ეკონომიკის ექსპერტი აკაკი ცომაიაც. ანალიტიკოსი გამოსავალზე საუბრობს და ამბობს, რომ სახელმწიფოს ფასების დარეგულირება აქციზის გადასახადის დაწევის ხარჯზე შეუძლია. აკაკი ცომაიას თქმით, ამ შემთხვევაში საწვავი აღარ გაძვირდება.
„საერთაშორისო ფასი იზრდება ბაზარზე, ეს მსოფლიო მოვლენაა და შესაბამისად მოცემულობაა. სახელმწიფოს თავისუფლად შეუძლია, რომ ძალიან მარტივად შეამციროს აქციზის გადასახადი. მართალია ბიუჯეტში საგადასახადო შემოსავალი შემცირდება მაგრამ დარწმუნებული ვარ, რომ ეს საგადასახადო შემოსავალი უფრო კარგ მიზნებს ვერანაირად ვერ მოხმარდება და სჯობს რომ აქციზის გადასახადი მნიშვნელოვნად შემცირდეს და ამ შემთხვევაში საწვავზე ფასიც მნიშვნელოვნად შემცირდება,“-განაცხადა აკაკი ცომაიამ.
Print
ბოლო სიახლეები