როდის არის ფეხმძიმობა საშიში და რამდენი ბავშვის გაჩენაა ქალისთვის რეკომენდირებული

არსებობს ორი მოსაზრება, რომლებიც ერთი შეხედვით ერთმანეთს ეწინააღმდეგება. ერთის მიხედვით ბავშვის გაჩენა ჯანმრთელობისთვის სასარგებლოა. მეორე მოსაზრების თანახმად კი ფეხმძიმობა და მშობიარობა ორგანიზმს ასუსტებს. რომელია აქედან მართალი და რამდენი შვილის გაჩენაა ქალისთვის რეკომენდირებული.

სპეციალისტები ერთხმად აღნიშნავენ, რომ ბავშვის გაჩენა ქალის ორგანიზმისთვის აუცილებელია. ფეხმძიმობა და მშობიარობა ქალის იმუნიტეტის და ტონუსის უძლიერესი აქტივატორია. ეს პროცესი ქალის ორგანიზმის ყველა ფარული რეზერვის მობილიზებას იწვევს, ხელს უწყობს ჯანმრთელობას და სიცოცხლის ხანგრძლივობას.  ექიმების ნაწილის აზრით ქალის ორგანიზმი სამი–ოთხი შვილის გაჩენაზეა “გათვლილი“ და თუ ეს არ ხდება, ჩნდება სხვადასხვა დისბალანსი ორგანიზმში და გარკვეული დაავადებებიც.

თუმცა ცალსახა პასუხი კითხვაზე,, რამდენი ბავშვის გაჩენა ჯობს ქალის ორგანიზმისთვის არ არსებობს. ეს ბევრ ფაქტორზეა დამოკიდებული. სხვადასხვა ქალი სხვადასხვაგვარად იტანს ფეხმძიმობას და მშობიარობას. ზოგი ხუთ–რვა შვილს აჩენს და ეს მათ ჯანმრთელობაზე უარყოფითად არ აისახება, ზოგი კი ერთი შვილის გაჩენის შემდეგაც დიდხანს ვერ ახერხებს ძალების აღდგენას. ყველაფერი ინდივიდუალურია.

რა პერიოდულობით შეიძლება ბავშების გაჩენა

თეორიულად ქალი შესაძლოა ახალი ფეხმძიმობისთვის მშობიარობიდან ორ–სამ თვეში იყოს მზად. ზოგიერთს სჯერა, რომ ძუძუთი კვების დროს დაფეხმძიმება შეუძლებელია, თუმცა სწორედ ამას შეყავს შეცდომაში ბევრი დედა და მოულოდნელად ფეხმძიმდება. ხშირად შეგხვდებათ ერთ წელს დაბადებული და–ძმა, რაც ზემოთმოყვანილ მითს აცამტვერებს.

სიტუაცია შესაძლოა გართულდეს, თუ წინა ჯერზე ქალმა საკეისრო კვეთით იმშობიარა. თუ დაფეხმძიმება საკეისრო კვეთის შემდეგ პირველ ექვს თვეში მოხდა, ამ შემთხვევაში ყველაფერი ნაკერის მდგომარეობაზეა დამოკიდებული. არ არის გამორიცხული, ფეხმძიმობის დიდი ნაწილის გატარება ქალს სტაციონარში მოუწიოს, რომ ნაკერი არ გაიხსნას. იდეალურ შემთხვევაში საკეისრო კვეთის შემდეგ დაფეხმძიმება 1.5–2 წელი არ არის სასურველი.

ნორმალურ ვითარებაში ქალის ორგანიზმი ბუნებრივი გზით მშობიარობის შემდეგ 2–3 წელში ახერხებს სრულად  აღდგენას. ყოველი  შემდგომი მშობიარობა კი აღდგენის პერიოდს ახანგრძლივებს. თუ ქალი შვილების გაჩენას კიდევ აპირებს, სწორი ცხოვრების წესი უნდა აირჩიოს: თავი არიდოს ზედმეტ დატვირთვას სამსახურში და სახლში, დაკავდეს სპორტით, იკვებოს ჯანსაღი საკვებით და მიიღოს ვიტამინები.




რატომ არის საშიში ხშირი მშობიარობა

ხშირი ფეხმძიმობა და მშობიარობა ორგანიზმისთვის დიდი სტრესია, რადგან ფეხმძიმობის პერიოდში ინტენსიური ჰორმონალური გადაწყობა ხდება. თუ ფეხმძიმობა ხშირია, ეს ენდოკრინული დარღვევების და შინაგანი ორგანოების პრობლემების გამომწვევი შეიძლება გახდეს. ეს შეიძლება საშიში იყოს როგორც დედისთვის, ასევე ბავშვისთვისაც. არსებობს რიგი პათოლოგიები, რომელთა შემთხვევაში მშობიარობა საერთოდ აკრძალულია ან ნებადართულია მხოლოდ გარკვეული დათქმით. მათ შორის არის  მაგალთად მეორე ხარისხის შაქრიანი დიაბეტი. ამ დაავადების დროს არ არის რეკომენდირებული ერთზე მეტი ბავშვის გაჩენა. ფეხმძიმობის დროს კი მომავალი დედა ზუსტად უნდა დაემორჩილოს ექიმების რეკომენდაციებს.  არასასურველი პროცესების განვითარების რისკს ზრდის როგორც მეტისმეტად ადრეული, ასევე გვიანი ფეხმძიმობა. როგორც ექიმები ამტკიცებენ,  ზოგადად, ფეხმძიმობისთვის ოპტიმალური ასაკი20–30 წელია.

რა თქმა უნდა,  წინა საუკუნეებში ქალები იმდენ შვილს აჩენდნენ, “რამდენსაც ღმერთი მისცემდა,“ ზოგჯერ ყოველ წელს – 17–18 წლის ასაკიდან მენოპაუზამდე. იმ დროს ეს გარდაუვალი იყო, რადგან მაღალი იყო ბავშვთა სიკვდილიანობა, არ არსებობდა ჩასახვის საწინააღმდეგო საშუალებები.  გარდა ამისა, ჩვენი წინაპრები ეკოლოგიურად სუფთა პროდუქტებს მიირთმევდნენ და არა ქიმიას, უფრო ხშირად ინფექციით კვდებოდნენ, ვიდრე კიბოთი ან ათეროსკლეროზით. თუმა ხშირი მშობიარობა საკმაოდ უარყოფითად აისახებოდა ქალის ორგანიზმზე და ჯანმრთელობაზე. ორმოცი წლის ასაკში ქალები მოხუცებივით გამოიყურებოდნენ. მათ უწევდათ ბავშვების გაზრდა, სახლის მოვლა, ზოგჯერ ფიზიკური შრომა ოჯახურ მეურნეობაში. ახლა კი 40 წლის ქალებს ასაკს საერთოდ ვერ შეატყობ.




რისკჯგუფები

ხანგრძლივი კვლევების შედეგად ექიმები მივიდნენ დასკვნამდე, რომ ქალისთვის ფეხმძიმობის და მშობიარობის ოპტიმალური რაოდენობა ორიდან ოთხამდეა. მეცნიერთა ერთი ჯგუფი 37 წლის მანძილზე აკვირდებოდა 45 000 ქალს და მივიდა დასკვნამდე, რომ დედებში, რომლებმაც მხოლოდ ერთი შვილი გააჩინეს ნაადრევი სიკვდილის რისკი 3.7% იყო.   მათში კი ვინც 5 –9 შვილი გააჩინა – 13.5%.  მათ შორის, ვინც 2–4 შვილი გააჩინა ნაადრევი სიკვდილის რისკი მინიმალურია.  გარდა ამისა, მრავალშვილიან დედებს უფრო ხშირად უვითარდებოდათ სიმსივნე, დიაბეტი, გულ–სისხლძარღვთა სისტემის დაავადებები. თუმცა უნდა ითქვას, რომ პირდაპირი ურთიერთკავშირი ამ დაავადებებსა და მშობიარობის რაოდენობას შორის ჯერჯერობით არ დადგენილა.

მოკლედ, საშუალოდ ქალისთვის უსაფრთხო და რეკომენდირებულია სამჯერ მშობიარობა. თუმცა ყველაფერი რა თქმა უნდა ინდივიდუალურია და კონკრეტულ გარემოებებზეა დამოკიდებული.

Print
ბოლო სიახლეები
Facebook
პოპულარული
რეკლამა


რეკლამა