გერმანიამ საქართველო და მოლდოვა უსაფრთხო ქვეყნების სიაში შეიყვანა, რაც იმას ნიშნავს, რომ გერმანია ამიერიდან ბევრად უფრო სწრაფად შეძლებს საქართველოს და მოლდოვის იმ მოქალაქეების დეპორტაციას , რომლებიც გერმანიაში თავშესაფარს ვერ მიიღებენ. მათი განაცხადები უფრო სწრაფად დამუშავდება და უარის შემთხვევაში საქართველოს მოქალაქეებს გერმანიიდან უფრო სწრაფად გააძევებენ. დღეს ფედერალურმა მთავრობამ შინაგან საქმეთა მინისტრ ნენსი ფეზერის მიერ წარდგენილ პროექტს ოფიციალურად დაუჭირა მხარი .მინისტრის ინფორმაციით, გერმანია გეგმავს საქართველოსა და მოლდოვასთან გააფორმოს მიგრაციასთან დაკავშირებული შეთანხმებები, რაც გერმანიაში ჩასვლის მსურველებს მისცემს განათლების მიღების და მუშაობის შესაძლებლობას და უზრუნველყოფს საქართველოსა და მოლდოვაში იმ მოქალაქეების სწრაფად დაბრუნებას, რომლებსაც გერმანიაში დარჩენის უფლება არ აქვთ.
გადაწყვეტილებას აკრიტიკებს ოპოზიცია და უფლებადამცველთა ჯგუფები. მათი აზრით, გერმანიის მთავრობა არ ითვალისწინებს იმ ფაქტს, რომ რუსეთს საქართველოს და მოლდოვის რეგიონები ოკუპირებული აქვს. გარდა ამისა, ჯგუფის შეფასებით, საქართველოში პრობლემებია კანონის უზენაესობის და ლგბტ+ პირთა უფლებების დაცვის, ხოლო მოლდოვაში პრესის თავისუფლების მხრივ.
თავის მხრივ, გერმანიის შინაგან საქმეთა მინისტრმა ნენსი ფეზერმა განაცხადა, რომ საქართველოს და მოლდოვას ევროკავშირის წევრობა სურთ და ამ ქვეყნებში, როგორც წესი, ადამიანებს არ ემუქრება პოლიტიკური ნიშნით დევნა. ფეზერის თქმით, გერმანიაში თავშესაფრის მაძიებელთა შორის თითქმის ყოველი მეათე საქართველოდან და მოლდოვიდანაა ჩასული, ამ ქვენების უსაფრთხოდ აღიარება კი, ხელს შეუწყობს არალეგალური მიგრაციის სწრაფად და ეფექტიანად შემცირებას.
გერმანიის შსს-ს მონაცემებით, 2022 წელს თავშესაფარი ითხოვა საქართველოს 8 865-მა და მოლდოვის 5 218 მოქალაქემ. განაცხადებიების 99,9% არ დაკმაყოფილდა.
