ინგლისური საფეხბურთო კლუბ ”ვესტ ჰემ” იუნაითედის ფეხბურთელი, კურტ ზუმა დროებით ჩამოაშორეს თამაშებს, საკუთარმა კლუბმა ასეთი შემთხვევებისთვის გათვალისწინებული მაქსიმალური თანხით – 250 ფუნტით დააჯარიმა და ამავე დროს ორი კატა ჩამოართვეს.
ყველაფერი კი სოციალურ ქსელებში მისი ძმის მიერ გავრცელებული ვიდეოთი დაიწყო, რომელზეც ჩანს, რომ ზუმა საკუთარ ბენგალურ კატას წიხლს ურტყამს, შემდეგ დასდევს და მოგვიანებით ხელს ურტყამს იმ დროს, როცა კატა ბავშვს უჭირავს. კადრში ისმის სიცილი, რომელიც ქმნის განცდას, რომ იქ მყოფებს ეს სიტუაცია ართობს. ბრიტანული მედიის ინფორმაციით ფეხბურთელის რეაქცია კატის მიერ ქოთნის გატეხვას მოჰყვა.
ცხოველზე ძალადობის კადრებმა საყოველთაო განრისხება გამოიწვია. დაახლოებით 200 ათასმა ადამიანმა ინტერნეტში პეტიციას მოაწერა ხელი მოთხოვნით ფეხბურთელი კანონის შესაბამისად დაესაჯათ. ბრიტანეთის კანონმდებლობით ცხოველზე ძალადობა სერიოზული ჯარიმებით და 5 წლამდე პატიმრობით ისჯება.
საპასუხოდ მაშინვე დაიწყო ბოდიშები: თავიდან თავად ზუმას მხრიდან, შემდეგ ვესტ ჰემის მწვრთნელის მხრიდან, რომელმაც ის სამშაბათს პრემიერ–ლიგის მატჩზე ათამაშა. გუნდის მთავარ მწვრთნელს, დევიდ მოიესს მოუწია საზოგადოება დაერწმუნებინა, რომ ცხოველები ძალიან უყვარს და თავი იმით იმართლა, რომ გუნდს მატჩის მოგება ძალიან ჭირდებოდა.
თუმცა სკანდალი არ ცხრებოდა და კიდევ უფრო მწვავდებოდა. კატის დასაცავად კლუბის სპონსორები და ცნობილი ადამიანები გამოვიდნენ. მატჩის დროს ორივე გუნდის გულშემატკივრები ფეხბურთელს უსტვენდნენ, პოპულარულმა ტელეწამყვანმა, წარსულში ინგლისის ნაკრების ფორვარდერმა გარი ლინეკერმა კი განაცხადა, რომ გაოგნებულია იმით, რომ ზუმა სათამაშოდ გამოუშვეს და ამ გადაწყვეტილებას უგულობა უწოდა.
ესექსის საგრაფოს პოლიციამ სამშაბათს განაცხადა, რომ დაიწყო სასწრაფო გამოძიება, თუმცა მედიის ცნობით მალე საქმის აღძვრაზე უარი თქვა.
ამასობაში ბრიტანეთის ცხოველების დაცვის სამეფო საზოგადოებამ ორივე კატის კონფისკაცია მოახდინა. ორგანიზაცია აცხადებს, რომ ზუმას კატები ვეტერინარებმა შეამოწმეს და მათ ჯანმრთელობას არაფერი ემუქრება.
კომპანია Vitality–მ განაცხადა, რომ ვიდეომ ძალიან გაანაწყენა, კლუბის ხელმძღვანელობის ქმედებებმა კი მათი იმედგაცრუება გამოიწვია, ამიტომაც სასწრაფოდ აჩერებს კლუბის სპონსორობას და დაელოდება, რა ნაბიჯებს გადადგამს მისი ხელმძღვანელობა.
მეორე სპონსორმა, კომპანია Experience Kissimmee–მ განაცხადა, რომ მას შემდეგ, რაც სამშაბათს ზუმა მინდორზე გამოუშვეს, ისიც გადახედავს კლუბთან მის სასპონსორო ურთიერთობებს.
კომპანია Adidas-მა ოთხშაბათს საღამოს ასევე განაცხადა, რომ მოთამაშესთან კონტრაქტს წყვეტს.
კლუბ ვესტ ჰემის გულშემატკივართა ასოციაციამ განაცხადა, რომ ზუმას ქმედებას გმობს და ვარაუდობს, რომ ფეხბურთელი დისციპლინარული განხილვის დროს თამაშებს უნდა ჩამოაშორონ.
“მოთამაშე დაუყოვნებლივ დათანხმდა ჯარიმის გადახდას და ეს თანხები საქველმოქმედო ორგანიზაციების ფონდებში წავა, რომლებიც ცხოველებზე ზრუნავენ“– ნათქვამია კლუბის მიერ ოთხშაბათს გავრცელებულ განცხადებაში. კლუბმა კიდევ ერთხელ გაუსვა ხაზი, რომ გმობს კურტის ქმედებას და ეს საკითხი ძალიან სერიოზულად განიხილება.
კურტ ზუმა ფრანგული საქველმოქმედო ორგანიზაცია Seed–ის ოფიციალური ელჩია, რომელიც ლომების და კატისებრთა ოჯახის სხვა მსხვილი მტაცებელი ცხოველების დაცვით არის დაკავებული.
ADIDAS-მა კურტ ზუმას კატაზე ძალადობის გამო კონტრაქტი შეუწყვიტა
