პრემიერმინისტრი ირაკლი ღარიბაშვილის განცხადებით, დღეიდან მედიკამენტების იმპორტისთვის თურქეთის ბაზარი გაიხსნა, რაც წამლის ფასების შემცირებას გამოიწვევს.
“ჩვენ დღეს ხელი მოვაწერეთ მთავრობის განკარგულებას, შესაბამისად, უკვე გაიხსნა თურქეთის ბაზარი. შესაბამისად, თურქეთიდან შემოვა GMP-ის მაღალი ხარისხის წამლები. საგრძნობლად დიდია სხვაობა ფასებს შორის.
ყველაზე მოთხოვნადი წამლები, პირობითად, ჩვენთან თუ ღირს 10 ლარი, თურქეთში ღირს ლარი და 2 ლარი, ამიტომ არავითარი არგუმენტი იმისა, რატომ არ უნდა ყოფილიყო გახსნილი თურქეთის ბაზარი, არ არსებობს, ვერ მოვისმინე, ამიტომ მივიღე გადაწყვეტილება და თურქეთის ბაზარი გაიხსნა. იმედი მაქვს, იმპორტიორი კომპანიები მაღალი ხარისხის წამლებს შემოიტანენ თურქეთიდან, რაც მნიშვნელოვნად გააიაფებს წამლებს საქართველოში”. – თქვა ირაკლი ღარიბაშვილმა მთავრობის სხდომაზე.
მანვე აღნიშნა, რომ მთავრობის ამოცანა უნდა იყოს მედიკამენტებზე ფასების მონიტორინგი და ხარისხის კონტროლი.
