“მათი პოლიტიკური ფსიქოლოგიიდან გამომდინარე ბოლოს შეიძლება „ლეგიტიმური მკვლელობები“ განიხილონ მოცემულობად“–მდინარაძე ოპოზიციაზე

მათი პოლიტიკური ფსიქოლოგიიდან გამომდინარე, ბოლოს შეიძლება “ლეგიტიმური მკვლელობები” განიხილონ,- ასე ეხმიანება ფრაქცია “ქართული ოცნების” თავმჯდომარე მამუკა მდინარაძე ჟურნალისტებთან ოპოზიციაში გაკეთებულ განცხადებებს.

ფრაქცია ქართული ოცნების თავმჯდომარე, მამუკა მდინარაძე ოპოზიციას პასუხობს და ამბობს, რომ ოპოზიცია საკუთარი “უგუნური” გადაწყვეტილებების გამო ჩიხშია შესული.

“ბოლო დღეების განმავლობაში ოპოზიციური პარტიების ლიდერების, განსაკუთრებით ევროპული საქართველოს ოდიოზური ლიდერის ლექსიკაში გაჩნდა ფრაზები – ძალადობა და დაემატა ძალადობას – ლეგიტიმური, მათი პოლიტიკური ფსიქოლოგიიდან გამომდინარე ბოლოს შეიძლება „ლეგიტიმური მკვლელობები“ განიხილონ მოცემულობად. რეალურად გაიხსნა ყველა კარტი, როგორც იტყვიან, მათი საუბრის მთავარი საყრდენი იყო “გაყალბებული არჩევნები” და აღმოჩნდა,რომ არჩევნები კი არა, თურმე, პარალელური დათვლის მონაცემები ყოფილა გაყალბებული, რასაც ისინი ეყრდნობოდნენ და ალბათ წლები გავა და ამას გავიხსენებთ როგორც სკანდალურ და ძალიან ცუდ მოვლენას.

გვახსოვს, ისინი საუბრობდნენ მშვიდობიან ფორმებზე, მოლაპარაკებებზე და როცა ჩიხში შევიდნენ, თავიანთი პოლიტიკურად უგუნური გადაწყვეტილებების გამო, ახლა დაიწყეს ლეგიტიმურ ძალადობაზე თუ რევოლუციაზე საუბარი და “მსხვერპლზე”- ასეთი ტერმინიც ახსენა ბოკერიამ, ამის “გაპრავებით” არიან ახლა დაკავებულები”- განაცხადა მდინარაძემ.

შეგახსენებთ, რომ ოპოზიციასა და ხელისუფლებას შორის მოლაპარაკების მეხუთე რაუნდის გამართვა უკვე ორი კვირაა იგეგმება, თუმცა ამ დრომდე უცნობია, შედგება თუ არა საერთოდ ეს რაუნდი. მოლაპარაკებები ამ დროისთვის ჩიხშია შესული.

“ევროპული საქართველოს” ლიდერმა გიგა ბოკერიამ განაცხადა, რომ ერთადერთი სწორი გზა ვადამდელი, არჩევნებია. “ვისაც ძალაუფლება აქვს ხალხს ეუბნება, რომ არჩევნებს ვაუქმებ, რჩება 2 სცენარი, ან დიქტატურისკენ სვლის შეგუება ან ლეგიტიმური რევოლუცია, პირველი კატასტროფაა და არც მეორე გვსურს, გვსურს ვადამდელი არჩევნები,”- აცხადებს ბოკერია.

ნაციონალური მოძრაობის ლიდერი, ნიკა მელია კი ამბობს, რომ  “როცა ყველა ინსტიტუტს აუქმებ, ერთი კაცის პარლამენტი გაქვს, სასამართლო აღარ არსებობს, საზოგადოების პროტესტი გადაიზრდება უკმაყოფილებაში და ტრანსფორმირდება მათ შორის, მშვიდობიან რევოლუციაში”.