ჩვენი კანი ბევრ რამეს იტანს: საკვები ნივთიერებები მას ყველაზე ბოლოს ხვდება. მას უწევს გარეგანი ზემოქმედების ატანა და იცავს შინაგან ორგანოებს, ახდენს თერმორეგულაციას, გამოაქვს ორგანიზმიდან დღეღამეში დაახლოებით ერთი ლიტრი სითხე, რითაც თირკმელებს ეხმარება… სწორედ ამ უკანასკნელ ფუნქციაზე ვისაუბრებთ. ჩვენი ორგანიზმიდან ხრწნის პროდუქტების და მავნე ნივთიერებების გამოდევნაზე ლიმფური ნაკადია პასუხისმგებელი. ანუ, ლიმფური სითხეების გადაადგილება. ეს სწორედ კანის საფარში ხდება. ლიმფის მოცულობა ადამიანის ორგანიზმში სისხლისას აღემატება, ამიტომაც ეს დატვირთვა სულაც არ არის სახუმარო. სისტემაში პატარა ხარვეზი და სითხე დაგროვებას იწყებს, განსაკუთრებით თეძოებში, მუცელზე და ღაბაბთან.
ვინაიდან სწორი კვების წესებს ყველა ვარღვევთ, ცოტას ვმოძრაობთ, გემრიელ და მავნე საკვებზე უარს არ ვამბობთ, გასაკვირი არ არის, რომ სისტემა მწყობრიდან ხშირად გამოდის. კარგი ამბავი ის არის, რომ თუ დღეში საკუთარ თავს 10 წუთს დაუთმობთ, ნორმალური ლიმფოდრენაჟი აღდგება და ერთი კვირის შემდეგ შეამჩნევთ, როგორ სწრაფად იკლებთ წონაში. შეიძლება საკუთარ თავს ლიმფოდრენაჟული მასაჟი გაუკეთოთ როგორც სხეულზე, ისე სახეზე.
- საკუთარ სხეულს ლიმფოდრენაჟული მასაჟი ნატურალური ბეწვის ჯაგრისით უნდა გაუკეთოთ.
- ჯობს მასაჟი შხაპის მიღებამდე გაიკეთოთ
- მთელი მასაჟი წრიული მოძრაობებით კეთდება, ქვევიდან ზევით, პერიფერიებიდან ცენტრისკენ. სწორედ ასე მოძრაობს ლიმფა ჩვენს ორგანიზმში.
- არ არის საჭირო კანზე ჯაგრისის უხეში მოძრაობა. შეხება კომფორტული უნდა იყოს.
- მუცლის მასაჟი წრიულად უნდა გაკეთდეს, მარჯვნიდან მარცხნივ.
- მასაჟი ფეხების, ხელის გულების და ტერფების ლიმფოდრენაჟული მასაჟით უნდა დაასრულოთ.
