12 ქვეყანა მზადაა 100 ცალი Leopard-2-ის ტანკი გადასცეს უკრაინას, როგორც კი გერმანია მიწოდების ნებართვას მისცემს. აღნიშნულ ინფორმაციას ABC NEWS-ი ავრცელებს.
ABC News-ის ცნობით, „რამშტაინში“ გაიმართა დახურული შეხვედრა, სადაც განიხილეს, რომ სახელმწიფოები მზად არიან გაგზავნონ თავიანთი ტანკები, როგორც კი გერმანია დათანხმდება ექსპორტის ლიცენზიის გაცემაზე.
ამის შესახებ უკრაინელმა ოფიციალურმა პირმა ABC News-თან ანონიმურად განაცხადა. მისი თქმით, უკრაინამ შესაძლოა 100-მდე ტანკი მიიღოს, თუ გერმანია ექსპორტის ლიცენზიას გასცემს. ოფიციალურმა წარმომადგენელს არ უთქვამს, კონკრეტულად რომელ ქვეყნებზეა საუბარი, მაგრამ ოფიციალურად პოლონეთმა და ფინეთმა უკვე ისაუბრეს ტანკების გადაცემაზე.
