შეიძლება სასულიერო პირმა გინებაც დაიწყოს, მრისხანებაც გამოხატოს, ვიღაცას დაარტყას კიდეც. ასეთი მდგომარეობაა დღეს უკვე სასულიერო პირებში, სამწუხაროდ, – ამის შესახებ მროველ-ურბნელმა მიტროპოლიტმა იობმა (აქიაშვილი) ბანას წმ. გრიგოლ ხანძთელის სახელობის მამათა მონასტერში ქადაგებისას განაცხადა.
მისივე თქმით, დღეს სასულიერო პირები ცდილობენ „კომფორტი შეიქმნან“, „კარგად მოაწყონ კელიები“ და ავიწყდებათ უფლის სწავლება, რომ მთავარია თავმდაბლობა.
„ღვაწლი უნდა წარმართო იქით რომ თავმდაბლობა მოიპოვო. აბა, შენიშვნა მიეცი მოძღვარს – გაღიზიანდება. ასეთი მდგომარეობით რომელი მღვდელი ცხონდება. რაც მეტი ხარისხი გვეძლევა მეტი თავმდაბლობა და უბრალოება გვმართებს.
სამწუხაროდ, ერული სული შემოიჭრა ეკლესიაში. ბოლო ჟამს, სასულიერო პირები ერის კაცის დონეზე დავლენო და ერის ადამიანები ცხოველის დონეზე დავლენო, ზუსტად ეს დროა ჩვენს დროში. უკვე სირცხვილის გრძნობა აღარ აქვთ ადამიანებს. დღეს სასულიერო პირები მეტყველებენ როგორც ერისკაცები. არადა, სასულიერო პირის სამეტყველო ენა სხვაა, უფრო მოკრძალებული უნდა იყოს, უფრო მოზომილი. დღეს შეიძლება სასულიერო პირმა გინებაც დაიწყოს, მრისხანებაც გამოხატოს, ვიღაცას დაარტყას კიდეც. სამწუხაროდ, ასეთი მდგომარეობაა დღეს უკვე სასულიერო პირებში.
დღეს, ჩვენი სასულიერო პირების ნაწილი ცდილობს, საზოგადოებას მოაწონოს თავი, „ფეისბუქში“ დებს სურათებს, მთელი ყურადღება ამაზე აქვს გადატანილი, თუ რა მოწონება იქნება, ვინ რას იტყვის. „ფეისბუქში“ როგორი კომენტარები დაიწერება, ესაა მთავარი. დებს იქ თავის ფოტოებს, რაღაც სიტყვებს წარმოთქვამს და კომენტარებს ელოდება, მთელი მისი არსი, სულიერი მდგომარეობა გადასულია სოციალურ ქსელებში.
ამ დროს ღმერთი ავიწყდება. ეს მდგომარეობა ღმერთს გვაცილებს. დღეს ეშმაკი იქითკენაა მიმართული, რომ კაცობრიობა დააცილოს ღმერთს. ამიტომ, უნდა შევეცადოთ, რომ ნაკლები ურთიერთობა გვქონდეს სოციალურ ქსელებთან, რადგან დროს გვართმევს… ხშირად ბერი ერთობა ისე, როგორც ერის კაცი…
დღეს (18 ოქტომბერს) არის ქართველ ღვაწლმოსილ ბერთა ხსენება. გრიგოლ ხანძთელის და მის თანამოღვაწეთა მამათა და დედათა… შეგვეწიოს, შეეწიოს ამ მონასტერს“ – განაცხადა მეუფე იობ აქიაშვილმა.