{{ARTICLEIMAGE}}როგორც მოგეხსენებათ, 9 თებერვალს საქართველოს ეროვნული ნაკრები პირველ თამაშს რუმინეთთან ჩაატარებს. ბორჯღალოსნების სამწვრთნელო შტაბმა 2019 წლის პირველი ორი მატჩისთვის გაფართოებული შემადგენლობა დაასახელა. გუნდში როგორც გამოცდილი, ისე ახალგაზრდა მოთამაშეები არიან.
ბორჯღალოსნები რუმინელებს 9 თებერვალს კლუჟში, საქართველოს დროით 16 საათზე დაუპირისპირდებიან. ხოლო მეორე მატჩს ესპანეთის წინააღმდეგ 17 თებერვალს 18 საათზე ავჭალაზე ჩაატარებენ.
ნაკრების მთავარი მწვრთნელი მილტონ ჰეიგი ამბობს, რომ დებიუტანტების გამოცდა სურს, აინტერესებს რა სარგებელს მოუტანენ ისინი ნაკრებს.
წარმოგიდგენთ საქართველოს ნაკრების გაფართოებულ შემადგენლობას:
პირველი ხაზი
პირველ ხაზში ორი გამოცდილი მორაგბეა – კვაჭი შალვა მამუკაშვილი და ბურჯი ლევან ჩილაჩავა, დანარჩენებს კი ბორჯღალოსნების კვართით 10 და ნაკლები თამაში ჩაუტარებიათ.
მეორე ხაზი
მეორე ხაზში ბრუნდება გიორგი ნემსაძე, რომელსაც ნოემბერში თიბისის სერიები ტრავმების გამო გაუცდა და რომელიც თებერვლის მატჩებისთვის გამოძახებულ რაზმში ყველაზე ასაკოვანია (34 წლის). გამოძახებულთა შორისაა ნოდარ ჭეიშვილი, რომელმაც 2018 წელს ერთის გარდა ყველა მატჩში მიიღო მონაწილეობა.
მესამე ხაზი
მესამე ხაზში ორი დებიუტანტის გარდა ბექა გორგაძე და გიორგი ცუცქირიძე, ასევე გამოცდილი გიორგი თხილაიშვილი ითამაშებენ.
ბურჯ თორნიკე მატარაძეს ნაკრების კვართით შარშანდელი რაგბი ევროპის პირველი მატჩის შემდეგ, აღარ უთამაშია. ნაკრებს ხანგრძლივი შესვენების შემდეგ უბრუნდება ხაზის ორი მოთამაშე – გიორგი აფციაურმა ბოლოს 2016 წლის ნოემბერში, შოტლანდიის წინააღმდეგ ითამაშა, ხოლო მირიან მოდებაძე ქვეყნის მთავარ გუნდში სამივე კეპი 2017 წლის ნოემბერში მოაგროვა და მას შემდეგ ტრავმას მკურნალობდა.
ყველაზე გამოცდილი ამ ნაკრებში ლაშა მალაღურაძე, რომელსაც 88 მატჩი აქვს ჩატარებული. ნაკრებს უბრუნდება სოსო მათიაშვილი, რომელმაც იტალიასთან ტრავმა მიიღო. შეკრებაზე მყოფთაგან ყველაზე ახალგაზრდა თედო აბჟანდაძეა, რომელსაც დებიუტი ნოემბერში, სამოასთან ჰქონდა, ტონგას წინააღმდეგაც ითამაშა და ჯამში 22 ქულა მოაგროვა.
