ახალი ზელანდიის პრემიერმა, ჯასინდა არდერნმა საკუთარი ქორწილი გადადო მას შემდეგ, რაც განაცხადა, რომ ქვეყანა შეზღუდვების, ახალ, ყველაზე მაღალ დონეზე გადადის ომიკრონის ვარიანტის გავრცელების გამო.
ახალი წესების მიხედვით ნებისმიერ მასობრივ ღონისძიებაზე 100–ზე მეტი ადამიანის შეკრება დაუშვებელია, თუ ეს ადამიანები ვაქცინირებულები არიან. არავაქცინირებული ადამიანების შემთხვევაში კი 25 ადამიანზე მეტის ერთად შეკრება არ შეიძლება. მათ შორის ქორწილებსა და სხვა სადღესასწაულო ღონისძიებებზე. გარდა ამისა, მაღაზიებში, სკოლებში და საზოგადოებრივ ტრანსპორტში ნიღბის ტარება კვლავ საალდებულოა. იგივე ეხება სკოლების მოსწავლეებს მე–4 კლასის ზევით. შეკრებაზე შეზღუდვებია სპორტარბაზებშიც. ამ დრომდე ახალ ზელანდიაში კოვიდის 15 104 შემთხვევა და 52 გარდაცვალებაა დაფიქსირებული.
კვირას ჯასინდა არდრენმა ჟურნალისტებს განუცხადა, რომ მისი ქორწინება ტელეწამყვან კლარკს გეიფორდთან გადაიდო.
“ მე არაფრით განვსხვავდები ათასობით ახალზელანდიელისგან, რომლებზეც პანდემიამ ბევრად უფრო დამანგრეველი გავლენა მოახდინა, და პირველ რიგში ეს არის საყვარელ ადამიანთან ყოფნის შესაძლებლობის არქონა, როცა ისინი ავად არიან. ეს ბევრად უფრო მძიმე განცდაა ვიდრე ის, რასაც მე ახლა განვიცდი“–თქვა მან.
ახალი წესები ძალაში კვირას გამთენიისას შევიდა. მიზეზი ომიკრონის ვარიანტით დაინფიცირების 9 შემთხვევა გახდა. ახალი ზელანდიის ხელისუფლება პანდემიის დაწყებიდანვე ცდილობდა ქვეყნის გარე სამყაროსგან იზოლაცია მოეხდინა და მკაცრად რეაგირებს დაინფიცირების ბევრად დაბალ მაჩვენებლებზე, ვიდრე ევროპული ქვეყნები.
როგორც გაირკვა, ოჯახს, რომელიც ოკლენდში ქოროწილს ესწრებოდა სახლში, საუთ აილენდში დაბრუნების შემდეგ კორონავირუსის დადებითი ტესტი აღმოაჩნდა. დაინფიცირდა იმ თვითმფრინავის ეკიპაჟიც კი, რომლითაც ისინი მგზავრობდნენ. ჩინოვნიკების თქმით, ინფექციის გავრცელების მაჩვენებელი ამ შემთხვევაში შეიძლება ძალიან მაღალი აღმოჩნდეს.
ახალ ზელანდიაში პანდემიის დასაწყისიდანვე მკაცრი შეზღუდვები მოქმედებდა, რამაც ქვეყანას საშუალება მისცა ლეტალური შემთხვევები მინიმუმამდე შეემცირებინა. ქვეყანამ მსოფლიოში ერთ–ერთმა პირველმა ჩაკეტა საზღვრები და ლოქდაუნების დახმარებით ინფექციის ადრეული აფეთქებები აღკვეთა.
თუმცა დელტა ვარიანტის გამოჩენის შემდეგ არდერნი ვირუსის სრულად აღმოფხვრის სტრატეგიიდან მასობრივი ვაქცინაციის სტრატეგიაზე გადაერთო. ზოგიერთი მონაცემით ახალი ზელანდიის 12 წელს ზევით მოსახლეობის 94% სრულად ვაქცინირებულია.