ბრიტანელმა ნაფიცმა მსაჯულებმა ექთანი ლუსი ლეტბი დამნაშავედ ცნეს შვიდი ბავშვის მკვლელობაში.
მან ახალშობილები ორგანიზმში შპრიცით ჰაერის შეყვანის გზით 2015 წლის ივნისიდან 2016 წლის ივნისამდე პერიოდში მოკლა, როდესაც ჩესტერის საგრაფოს საავადმყოფოში მუშაობდა. ექთანი 2018 წლის ივლისში დააკავეს.
ლეტბი ასევე დამნაშავედ იქნა ცნობილი საავადმყოფოს ახალშობილთა პალატაში კიდევ ექვსი ბავშვის მოკვლის მცდელობაში, ისეთი მეთოდების გამოყენებით, როგორიცაა ჰაერის განზრახ ინექცია, ზედმეტი კვება და ინსულინით მოწამვლა.
ნაფიცმა მსაჯულებმა ვერ გამოიტანეს განაჩენი კიდევ ექვს ბრალდებაზე, რომლებიც ჩვილების მკვლელობის მცდელობას ეხებოდა. პროკურორებმა მოითხოვეს 28 დღე, რათა გადაწყვიტონ, მოითხოვენ თუ არა ხელახალ სასამართლო განხილვას ამ ბრალდებით.
მანჩესტერის სასამართლომ ლეტბის განაჩენი 21 აგვისტოს უნდა გამოუტანოს.
ახალშობილთა განყოფილების წამყვანმა კონსულტანტმა, სადაც ლუსი ლეტბი მუშაობდა, განუცხადა BBC-ს, რომ საავადმყოფოს ხელმძღვანელობამ დროულად არ გამოიძია მედდასთან დაკავშირებული ბრალდებები და ცდილობდნენ ექიმები გაეჩუმებინათ.
რატომ შეიძლება მოკვდე ჰაერის ინექციისგან
ჰაერის (ან ნებისმიერი სხვა აირის) ინექცია სასიკვდილოა არა მხოლოდ ჩვილისთვის, არამედ ზრდასრულისთვისაც.
სისხლძარღვების მეშვეობით ჰაერის „ბუშტი“ სწრაფად ხვდება გულში, სადაც თხევადი სისხლისგან განსხვავებით კუნთის შეკუმშვისას ის არ გადაისროლება აორტაში, არამედ მხოლოდ იკუმშება და მოცულობით ოდნავ მცირდება.
შედეგად გული აგრძელებს მუშაობას, მაგრამ ორგანიზმისთვის ჟანგბადის მიწოდება ჩერდება, რაც რამდენიმე წუთში სიკვდილს იწვევს.
საავადმყოფოს ადმინისტრაციამ ასევე დაგვიანებით მიმართა პოლიციას, მიუხედავად მრავალთვიანი გაფრთხილებებისა იმის შესახებ, რომ შესაძლოა ჩვილები ექთანმა მოკლა.
ჯერ კიდევ 2015 წლის ოქტომბერში, დეპარტამენტის წამყვანმა კონსულტანტმა, დოქტორმა სტივენ ბრეიმ პირველად განაცხადა, რომ შეშფოთებულია ლეტის ქცევით.
მაგრამ არანაირი ქმედება არ განხორციელებულა, რის შემდეგაც მან სცადა კიდევ ხუთი ბავშვის მოკვლა , რომელთაგან ორის მოკვლა მართლაც შეძლო.
ჯერჯერობით ცნობილია, რომ ლეტბიმ სულ 13 ახალშობილის სიცოცხლის მოსპობა სცადა. მათი გვარების გამჟღავნება სასამართლოს მიერ აკრძალულია, თუმცა ცნობილია, რომ დაიღუპა ხუთი ბიჭი და ორი გოგონა.
BBC-მ ჩაატარა საკუთარი გამოძიება იმის შესახებ, თუ როგორ შეძლო ლეტბიმ ამდენი ხნის მანძილზე ამდენი ახალშობილის მოკვლა და ზიანის მიყენება.
ჟურნალისტები გაესაუბრნენ დეპარტამენტის წამყვან კონსულტანტს, რომელმაც პირველმა გამოთქვა შეშფოთება ლეტბის შესახებ და საავადმყოფოს ჩანაწერები შეისწავლა.
გამოძიებამ გამოავლინა მთელი რიგი უხეში შეცდომები, რამაც გამოიწვია სერიოზული კითხვები იმის შესახებ, თუ როგორ რეაგირებდა საავადმყოფო ჩვილების სიკვდილზე.
სხვა საკითხებთან ერთად, გამოძიებამ დაადგინა, რომ:
საავადმყოფოს ხელმძღვანელმა ექიმებს ლეტისთვის წერილობით ბოდიშის მოხდა და მის მიმართ ბრალდებების შეწყვეტა მოსთხოვა.
საავადმყოფოს ორ თანამშრომელს დაევალა მოლაპარაკება ლეტბისთან შრომითი დავის მოსაგვარებლად, თუმცა ისინი ეჭვობდნენ, რომ ის კლავდა ბავშვებს.
როდესაც ლეტბი საბოლოოდ სხვა განყოფილებაში გადაიყვანეს, ის დაინიშნა განყოფილებაში, რომელიც რისკების მენეჯმენტითა და პაციენტების უსაფრთხოებით იყო დაკავებული. იქ მან არა მხოლოდ მოიპოვა წვდომა ახალშობილთა განყოფილების კონფიდენციალურ დოკუმენტებზე, არამედ აღმოჩნდა უფროს მენეჯერებთან უშუალო სიახლოვეს, რომლებსაც მისი საქმის გამოძიება დაევალათ.
ახალშობილთა სიკვდილიანობა არ იყო სათანადოდ შეტყობინებული, რის გამოც NHS–ის (ბრიტანეთის ჯანმრთელობის დაცვის ნაციონალური სისტემა ) სტრუქტურებმა ვერ მოახერხეს საავადმყოფოში უჩვეულოდ მაღალი სიკვდილიანობის მაჩვენებელზე ყურადღების გამახვილება. ამის შესახებ BBC-ს მენეჯერმა განუცხადა, რომელიც ჩვილების გარდაცვალების შემდეგ დაინიშნა თანამდებობაზე.
მიუხედავად იმისა, რომ ლეტბი დამნაშავედ ცნეს შვიდი ბავშვის მკვლელობაში, ის ცვლაში მუშაობდა მაშინაც, როდესაც საავადმყოფოში კიდევ ექვსი ბავშვი გარდაიცვალა. პოლიციამ ამ საქმეების გამოძიებაც დაიწყო.
როდესაც ლეტბი ლივერპულის ქალთა საავადმყოფოში მუშაობდა, იქ ორი ბავშვი გარდაიცვალა.
”მის ხელში ყველაზე უწყინარი და უვნებელი ნივთიერებები, როგორიცაა ჰაერი, რძე, რძე, სხვა სითხეები ან წამლები, მაგალითად ინსულინი, სიკვდილის იარაღი აღმოჩნდა„ – თქვა პროკურორმა პასკალ ჯონსმა სასამართლო პროცესის შემდეგ. “მან გამოიყენა თავისი ცოდნა შემზარავი მიზნებისთვის და პროფესიული უნარები ზიანის, მწუხარების და სიკვდილის იარაღად აქცია.”
ჯონსმა ასევე აღნიშნა, რომ „[მსხვერპლთა] მშობლები მის არაჯანსაღ ცნობისმოყვარეობას და ცრუ თანაგრძნობასაც შეეჯახნენ“.
ბრიტანეთის მთავრობამ გასცა დამოუკიდებელი გამოძიების ჩატარების ბრძანება მომხდარის შესახებ, რომელიც ლეტბის განაჩენის გამოტანისთანავე უნდა დაიწყოს.
ჯანდაცვის მინისტრმა სტივ ბარკლეიმ თქვა, რომ გამოძიების მიზანია„გასცეს პასუხი კითხვებზე, რომლებიც მნიშვნელოვანია დაზარალებული მშობლებისთვის და მათი ოჯახებისთვის“.
გამოძიება განიხილავს არა მხოლოდ ჩვილების გარდაცვალების უშუალო გარემოებებს, არამედ იმასაც, თუ როგორ რეაგირებდნენ საავადმყოფოს ადმინისტრაცია და მთლიანობაში NHS ექიმების საგანგაშო ანგარიშებზე და ზოგადად, მომხდარზე.
