უკრაინის პრეზიდენტი ვლადიმერ ზელენსკი არგენტინის პრეზიდენტის ხავიერ მაილის ინაუგურაციის ცერემონიალის დროს უნგრეთის პრემიერ-მინისტრ ვიქტორ ორბანს ესაუბრა.
საუბრის კადრები არგენტინის სენატის YouTube არხის პირდაპირი ტრანსლაციის დროს გამოჩნდა.
შეხვედრა და საუბარი არგენტინის პარლამენტის შენობაში, ცერემონიალის მსვლელობისას შედგა. ლიდერების წარმომადგენლები საუბრის დეტალებზე კომენტარს არ აკეთებენ.
უკრაინასა და უნგრეთს შორის ურთიერთობა კვლავ დაძაბულია რუსეთის შეჭრის მიმართ ბუდაპეშტის პოზიციის გამო.
ორბანმა არაერთხელ განაცხადა, რომ უკრაინა ვერ შეძლებს რუსეთის დამარცხებას ბრძოლის ველზე და ასევე გააკრიტიკა დასავლეთის ქვეყნების სტრატეგია კონფლიქტის მოგვარების საქმეში. უნგრეთი ხშირად ბლოკავს ევროკავშირის გადაწყვეტილებებს უკრაინის ფინანსური მხარდაჭერის შესახებ და ასევე არ უჭერს მხარს უკრაინის ევროკავშირში გაწევრიანებას.
14-15 დეკემბერს ბრიუსელში დაიწყება მოლაპარაკებები უკრაინის ევროკავშირში გაწევრიანებაზე, ასევე ევროკავშირის ფინანსურ და სამხედრო მხარდაჭერაზე უკრაინის მიმართ.
