უკრაინის პრეზიდენტი ვოლოდიმირ ზელენსკი ამბობს, რომ უკრაინას სხვა არჩევანი არ აქვს გარდა ვლადიმერ პუტინთან მოლაპარაკების მაგიდასთან დაჯდომისა, რადგან მხოლოდ მას შეუძლია ომის შეჩერება. ამის შესახებ ზელენსკიმ გერმანულ გამოცემა Bild-თან ინტერვიუში ისაუბრა, რასაც European Pravda ავრცელებს.
“დღეს უკრაინას სხვა გზა არ აქვს, გარდა მოლაპარაკების მაგიდასთან დაჯდომისა. რუსეთში სხვა ვერავინ შეძლებს ამ ომის შეჩერებას, მხოლოდ ის [პუტინი] წყვეტს, როდის დასრულდება ეს ომი”,– თქვა ზელენსკიმ.
მისივე განცხადებით, უკრაინის ქალაქებსა და სოფლებში რუსი სამხედროების სისასტიკის შემდეგ, “ის სიძულვილს გრძნობს რუსეთისა და რუსი ჯარისკაცების მიმართ“.
ჟურნალისტის თხოვნით, კომენტარი გაეკეთებინა მის ორ ფოტოპორტრეტზე, რომელთაგან ერთი ომამდეა გადაღებული, ხოლო მეორე – ბუჩაში მოგზაურობის დროს, ზელენსკიმ თქვა: „ეს ორი განსხვავებული ადამიანია“. მისი აზრით, ასეთი ცვლილება ქვეყნის სასიკეთოდ არის. ზელენსკის ეჭვი ეპარება, რომ ოდესმე ისეთივე გახდება, როგორიც ადრე იყო.
