პირველად ბრიტანული სამეფო ოჯახის ქორწილმა მსოფლიო მოულოდნელად გააოცა: პრინცესა ბეატრისმა პროტოკოლი დაარღვია და ქორწინების ფაქტი საიდუმლოდ შეინახა. მართალია სულ ცოტა ხნით, მაგრამ ასეთი რამ სამეფო ოჯახის ისტორიას არ ახსოვს, რომ წინასწარ ოჯახის წევრის ქორწინების შესახებ არაფერი ყოფილიყო ცნობილი.
პრინცესა ბეატრისისა და ბიზნესმენ ედოარდო მაპელი მოცის ქორწილის დეტალები მოგვიანებით გახმაურდა.
ბეატრისი და იტალიელი უძრავი ქონების მაგნატი ედო თავდაპირველად 29 მაისს გეგმავდნენ დაქორწინებას, თუმცა კორონავირუსის პანდემიის გამო იძულებულნი გახდნენ ცერემონია გადაედოთ. საბოლოოდ კამერული ზეიმი 17 ივლისს შედგა – თარიღი მისი უდიდებულესობის ნიშნობის თარიღს დაემთხვა. დედოფალ ელისაბედის შვილიშვილი უინძორის სასახლის პარკში მდებარე პატარა სამეფო სამლოცველოში დაქორწინდა, რომელიც იმ სახლიდან რამდენიმე ნაბიჯში მდებაროებს, სადაც ბეატრისი გაიზარდა. პრინცესა სამეფო ოჯახის პირველი წევრია, რომელიც ნეოგოთიკურ ეკლესიაში დაქორწინდა. ეს პატარა ეკლესია ასევე დედოფალ ვიქტორიას სამრეკლოს სახელით არის ცნობილი. ცერემონიალს, რომელიც გამთენიისას შედგა სულ 20 სტუმარი ესწრებოდა, რომელთა შორის იყვნენ პატარძლის მშობლები, დედოფალი ელისაბედი და პრინცი ფილიპი. არაფერია ცნოილი იმის შესახებ, ესწრებოდნენ თუ არა ცერემონიალს ქეით მიდლტონი და პრინცი უილიამი.
ყველაზე ამაღელვებელი და უჩვეულო დეტალი პატარძლის კაბა იყო, რომელიც დიზაინერმა ნორმან ჰარტნელმა შექმნა და რომელიც… მას დედოფალმა ათხოვა.
დედოფლის თაყვანისმცემლები აღფრთოვანებით შეხვდნენ ცერემონიალის ფოტოების გამოქვეყნებას, რომლებზეც ჩანს რომ ბეატრისმა საქორწილო კაბად ბებიის კაბა აირჩია. ბრილიანტებით გაწყობილი კაბა პატარძალმა ოდნავ გადააკეთა, მაგალითად სახელოები დაუმატა, რაც თავდაპირველ ვარიანტში არ იყო.
ეს კაბა ელისაბედ მეორეს 1962 წელს ფილმ “ლოურენს არაბიელის“ ლონდონური პრემიერის დროს ეცვა. კიდევ ერთხელ დედოფალი ამ კაბით 1967 წელს გამოჩნდა პარლამენტის საზეიმო გახსნის დროს. მაშინ დედოფალს თავზე დიადემაც ედგა.
მოკლედ, ბეატრისი ნამდვილად ისტორიული, ულამაზესი კაბით დაქორწინდა. რაც შეეხება დიადემას, მან ასევე ისტორიული რელიქვია გამოიყენა – დედოფალ მარიას დიადემა, რომელიც 1919 წელს არის დამზადებული. ის დედოფალ მარიას დედამ– დედოფალმა ვიქტორიამ ქორწილში აჩუქა. ეს დიადემა ედგა თავზე დედოფალ ელისაბედ მეორეს 1947 წელს პრინც ფილიპზე დაქორწინებისას.
წყვილი ერთმანეთს 2018 წლიდან ხვდება. მათ ურთიერთობას თან სდევდა სკანდალი, პრინცი ენდრიუს და მის კავშირებთან დაკავშირებით სექს დანაშაულისთვის გასამართლებულ ჯეფრი ეპსტეინთან. ამ სკანდალმა ქორწილის მზადებას ჩრდილი მიაყენა. ბოლო თვეებში ბევრს საუბრობდნენ იმაზე, შეასრულებდა თუ არა ბეატრისის მამა, იორკის ჰერცოგი ცერემონიალის დროს საკუთარ როლს და მიიყვანდა თუ არა ქალიშვილს საკუთრხეველთან. ბრიტანული მედიის ინფორმაციით მან ეს როლი შეასრულა.
კიდევ რამდენიმე დეტალი: ქორწინების ცერემოანიალი პანდემიის შესაბამისი რეკომენდაციებით ჩატარდა: 30–ზე ნაკლები ადამიანი, სოციალური დისტანცია, ტესტები ვირუსზე. დედოფალი ცერემოანიალზე უინძორის სასახლიდან მიიყვანეს, სადაც მან პრინც ფილიპთან ერთად ბოლო თვეები გაატარა – დედოფალი თვითიზოლაციაშია მას შემდეგ, რაც მარტში პანდემია დაიწყო.
ქორწილს ედოარდოს შვილი წინა ქორწინებიდან, ოთხი წლის კრისტოფერ ვოლფი ესწრებოდა.
