ინგა გრიგოლია აცხადებს, რომ ჩანაწერების გასაჯაროების შემდეგ ტვ პირველზე შეტევა მისთვის მოულოდნელი არ ყოფილა.
“გავლილი გვაქვს ყველაფერი, ვართ ძალიან გამოწრთობილი თაობა ამ ბრძოლისთვის რომ ვიყოთ მზად და გაძლევთ პირობას, არ დავთმობთ არცერთი წამით ამ ტელევიზიას, რომელიც აი ამ ხელებით გვაქვს აშენებული, ამ სტუდიაში, როცა ორი მიკროფონი იყო და მართლა ორი კამერით როცა ვმაუწყებლობდით. ამიტომ, გითხრათ, რომ არ ველოდითთქო მოგატყუებთ, რასაკვირველია ველოდი, რასაკვირველია ამ ჩანაწერების გასაჯაროების შემდეგ ველოდი ძალიან დიდ შემოტევას ტვ პირველზე”,– ამბობს გრიგოლია ბრიფინგზე.
ტელეწამყვანისთვის გაუგებარია, რატომ წერია განჩინებაში პროპორციული ძალის გამოყენების შესახებ, თუ პროკურატურა ტელევიზიაში შეჭრას არ აპირებს.
“დღეს რაც არ უნდა ენა მოიჩლიქონ ქართული ოცნების წარმომადგენლებმა და საზოგადოებას უთხრან პროკურატურის ორი სხვადასხვა განმარტებით, რომ უი, არა შეჭრა თურმე არ იგეგმება ტვ პირველში, მაშ, მე მაქვს კითხვა, რას ნიშნავს ჩანაწერი იძულებით შესვლასთან დაკავშირებით. წინააღმდეგობის შემთხვევაში იძულებით პროპორციული ძალის გამოყენებასთან დაკავშირებით… მაშ, ეს რას ნიშნავს?
მინდა გითხრათ, რომ ბევრი მთავრობა მინახავს, ძალიან ძლიერი და მაგარი რომ ეგონა თავისი თავი, შემდეგ ისე წასულან ეს მთავრობები, პოლიტიკოსები, მათი 70% ალბათ თავადაც ვერ იჯერებს, რომ ქვეყნის მმართველობაში იყვნენ” – განაცხადა ინგა გრიგოლიამ.
