ჯანდაცვის მსოფლიო ორგანიზაცია აცხადებს, რომ პრეპარატი რემდესივირი ვერანაირად ვერ ამცირებს Covid19–ით სიკვდილიანობას. პირველად ამ დასკვნის შესახებ ბრიტანულმა Financial Times–მა დაწერა, რომლის რეპორტიორებმა “სოლიდარობის“ პროგრამის ფარგლებში მიმდინარე კლინიკური კვლევების შედეგები მიიღეს. ჯანმომ კი ეს ინფორმაცია დაადასტურა. გარდა ამ ანტივირუსული პრეპარატისა, რომელიც თავის დროზე ებოლას სამკურნალოდ შეიქმნა, ასევე გამოიცადა სხვა წამლები, რომლებზეც ექიმები დიდ იმედებს ამყარებდნენ კორონავირუსის მკურნალობის პროცესში: ჰიდროქსილქლოროქინი, ლოპინავირი/რიტონავირი და ინტერფერონი. შედეგები მწარმოებლებისთვის სამწუხარო აღმოჩნდა:
“სამწუხაროდ გაირკვა, რომ ამ კვლევის მონაწილე არცერთი წამალი არ იძლევა იმედს სიკვდილიანობის მაჩვენებლის შემცირების თვალსაზრისით. ეს შედეგები არსებითად არ შეცვილა გარკვეული ქვეყნების, რეგიონების ან მოსახლეობათა ჯგუფების გამორიცხვის შემდეგაც“– აცხადებს ჯანმო. ცოტა ხნის წინ რემდესივირი აშშ–ს პრეზიდენტის, დონალდ ტრამპის მკურნალობაში გამოიყენეს, რომელმაც კორონავირუსი გადაიტანა.
