უკრაინის თავდაცვის სამინისტროს დაზვერვის ინფორმაციით რუსეთი ჯარის მობილიზაციას ვერ ახერხებს. ხშირია ჯარიდან თავის არიდების, თვითდაზიანების, დამალვის შემთხვევები.
რუსული სპეცრაზმის ქვედანაყოფებმა, რომლებსაც სირიაში ბრძოლის გამოცდილება აქვთ, მთლიანად უარი თქვეს მარიუპოლის შემდგომ შტურმზე. 2-4 აპრილს ამ ქვედანაყოფმა, უკრაინის შეიარაღებულ ძალებთან ბრძოლაში დაახლოებით 30 სამხედრო დაკარგა. ამიტომაც სპეცრაზმელებს აღარ უნდათ ბედი კიდევ ერთხელ სცადონ.
უკრაინის დაზვერვის ინფორმაციით, რუსეთში გაწვევის ბოლო მონაცემები მეტყველებს რუსი ახალგაზრდა კაცების დაბალ ინტერესზე საკონტრაქტო სამსახურის მიმართ. გაწვევის ანგარიშის მიხედვით ქალაქ ეკატერინბურგში რეზერვის 1%–ზე ნაკლები დათანხმდა კონტრაქტის გაფორმების შესაძლებლობაზე.
გასაუბრებაზე მისული 397 კანდიდატიდან ორმა გამოთქვა საბოლოო თანხმობა. უარი თქვა 52–მა, კონტაქტზე აღარ გავიდა 203, მიმდინარეობს მუშაობა 140 კანდიდატთან.
უკრაინის დაზვერვა საუბრობს ასევე უკვე მობილიზებულთა მძიმე მორალურ მდგომარეობაზე. მათი ინფორმაციით, 7 მარტს ნოვოაიდარის პოლიკლინიკიდან ლუგანსკის მიმართულებით 2 პაზის ტიპის ავტობუსი წავიდა დაჭრილი ჯარისკაცებით. მათი უმრავლესობა ფეხებში იყო დაჭრილი. ექიმების დასკვნით, ტრავმების ყველაზე სარწმუნო მიზეზი ჯარისკაცების თვითდაზიანება იყო, რათა საბრძოლო მოქმედებების ზონაში დაბრუნება აეცილებინათ თავიდან.
უკრაინის დაზვერვა ეკატერინბურგში გაწვევის შედეგების შესახებ დოკუმენტსაც აქვეყნებს.
