ექსპერტი გია ჯაფარიძე ხელისუფლების მიერ ორთვიანი შეზღუდვების შემოღებას აფასებს:
“ჩაგვკეტეს მაშინ, როცა ამის აუცილებლობა არ იყო. დააზარალეს ქვეყანა ეკონომიკურად, მოქალაქეები – ეკონომიკურად, ფსიქოლოგიურად, მორალურად, ხელისუფლებამ მოიგო პოლიტიკურად, ხელისუფლებასთან მყოფმა პირებმა მოიგეს ეკონომიკურად. არავინ იცის, სად წავიდა ხალხის სახელით აღებული ვალი და ხალხისთვის გამოგზავნილი ფინანსური დახმარება. არავინ იცის, სად დაილექა ეს ფული.
სამწუხაროა, რომ მაშინ მხოლოდ ერთი პოლიტიკური პარტია აპროტესტებდა, მაგრამ აპროტესტება აბსოლუტურად მცდარი რადიკალური პოზიციებიდან, შესაბამისად შეშინებული მოქალაქეებიდან მხარდაჭერა ვერ მიიღო. შემდეგ დაემატა რამდენიმე პარტიაც, მაგრამ ხელისუფლებას უკვე აწყვეტილი ჰქონდა.
მთელი წინასაარჩევნო კამპანია იყო კოვიდთან ბრძოლაში მოპოვებული “გამარჯვების” კაპიტალიზაცია, მასში ჩართული იყვნენ ხელისუფლების ერთგული ექიმები, რომლებმაც დაივიწყეს ჰიპოკრატე და მიეცნენ ჰიპოკრისიას. კამპანიას შემატეს ამორალური ტყუილები, რომელთა შექმნა/შეფუთვა/გავრცელებაში დაიხმარეს რუსეთის სპეციალური სადაზვერვო სამსახურები. მათი დახმარებით ჩამოაყალიბეს ფსევდო-პატრიოტული და ფსევდო-რელიგიური ნარატივი, რაშიც დაიხმარეს რუსეთის ეკლესიის ქართული განყოფილების თანამშრომლები და რის გამოც საპყრობილისთვის გაწირეს უდანაშაულო პროფესიონალი პატრიოტები.
ასეთი იდეოლოგიურ-ფინანსურ-პოლიტიკურად “მომზადებული” მივიდნენ არჩევნებამდე. იცოდნენ, რომ წინ იყო ეპიდემიის მეორე მძიმე ტალღა, მაგრამ არჩევნები არ გადადეს. სამწუხაროდ, არჩევნების გადადება არ მოითხოვეს არც ოპოზიციურმა პარტიებმა. ცხადი იყო, რომ საკუთარ “მომზადებას” ხელისუფლება არ ჩააგდებდა, თუნდაც მსხვერპლის ფასად არჩევნებს არ გადადებდა, რადგან გაზაფხულზე ის იქნებოდა ჩამოშლი ჯანდაცვის სისტემით, ჩამოშლილი ეკონომიკით, ჩამოშლილი ნდობით და სრულიად გაკოტრებული პოლიტიკურად, შესაბამისად წააგებდა. შემდეგ გააკეთეს ის, რაც გააკეთეს – დაიწერეს იმაზე მეტი, ვიდრე მიიღეს, იძალადეს, მოისყიდეს და მიიტაცეს სახელმწიფო, რითიც ბუნდოვან მომავალში გადადეს საქართველოს გრძელვადიანი ინტერესების განხორციელება.
თავიდანვე ცხადი იყო, რომ მეორე ტურის შემდეგ გამოაცხადებდნენ სრულ ლოქდაუნს. მოქალაქეთა ჯანმრთელობა ფეხებზე ჰკიდიათ, პოლიტიკური აქტიურობის შეზღუდვაა მიზანი. მივიღეთ ის, რაც მივიღეთ. ახლა ბევრი რამე გვიანია. მარტში უკვე ძალიან ნათელი იყო, რა გველოდებოდა ნოემბერში. უდანაშაულო ადამიანების სხვა ქვეყნის ინტერესების გამო დაჭერაც შერჩათ.
ასეთი რამე ადრეც ხდებოდა, 1937 წელს მაგალითად, ან სხვაგან, მაგალითად ტრუხილიოს რეჟიმში, საქართველოში დომინიკის რესპუბლიკის იმდროინდელ ამბებზე დაწერილი წიგნი პოპულარულია, მაგრამ გაკვეთილი მწარე გამოვა.
ავტორიტარიზმი დამყარდა. ასე მგონია. მალე ამის თქმის გამოც დაკითხვებზე დაგვიბარებენ. ჩვენი საერთაშორისო პარტნიორები ხშირად თავიანთ იმ წინამორბედებს ჰგვანან, რომლებსაც სიმშვიდეში შემოეპარათ საბჭოთა რუსეთი საქართველოს პირველ რესპუბლიკაში. სამწუხაროდ, ძალიან ცოტა პოლიტიკოსის გონიერების მჯერა ბარიკადების ორივე მხარეს.“– წერს გია ჯაფარიძე ფეისბუქზე.
