პარტია ლელო არ აღიარებს საპარლამენტო არჩევნების შედეგებს. პარტიის განცხადებით, ვადამდელი არჩევნები ერთადერთი გამოსავალია.
“2020 წლის არჩევნები უნდა ყოფილიყო გარდამტეხი ჩვენი ქვეყნისთვის. “ქართულმა ოცნებამ“ არჩევნების წინა პერიოდი და არჩევნების დღე აქცია დაშინების, მოსყიდვის, ძალადობის და გაყალბების პროცესად. არჩევნები, რომელიც არ გამოხატავს თავისუფალი ადამიანების ნებას ვერ იქნება ლეგიტიმური. “ლელო“ არ აღიარებს ამ არჩევნების შედეგს. მოვუწოდებთ ამომრჩეველს და სამოქალაქო საზოგადოებას ერთიანობისკენ… ვადამდელი არჩევნები ერთადერთი გამოსავალია ამ ჩიხიდან. “ლელო“ არ შეეგუება საქართველოში ხელისუფლების მიტაცებას და “ქართული ოცნების“ მიერ ქვეყნის დემოკრატიული მომავლის დასამარებას”,– აცხადებენ ლელოში.
არჩევნებს არალეგიტიმურად მიიჩნევენ სხვა ოპოზიციური პარტიებიც. ისინი დღეს, 16:00 საათიდან პარლამენტთან საპროტესტო აქციას ჩაატარებენ.
