კრემლმა პუტინთან დაახლოებული პოლიტიკოსის, რადას დეპუტატის, ვიქტორ მედვედჩუკის გაცვლასთან დაკავშირებით პირველი კომენტარი გააკეთა.
პუტინის პრესმდივნის, დიმიტრი პესკოვის თქმით, რუსეთმა არ იცის, სურს თუ არა მედვედჩუკს მისი სიტუაციის მოგვარებაში რუსეთის ჩართვა.
„რაც შეეხება გაცვლას, რომელზედაც კიევის სხვადასხვა ფიგურა ისეთი ხალისით, სიამოვნებით საუბრობდა: მედვედჩუკი არ არის რუსეთის მოქალაქე. მას არანაირი კავშირი არ აქვს სპეციალურ სამხედრო ოპერაციასთან. ის უცხოელი პოლიტიკური ფიგურაა. ჩვენ საერთოდ არ ვიცით, სურს თუ არა მას თავად რუსეთის მონაწილეობა მის წინააღმდეგ ამ ცილისმწამებლური სიტუაციის მოგვარებაში”,– განაცხადა პესკოვმა.
ცნობისთვის, რადას პრორუსი დეპუტატი, ვიქტორ მედვედჩუკი 12 აპრილს დააკავეს. ვოლოდიმირ ზელენსკიმ რუსეთს შესთავაზა მედვედჩუკის გაცვლა უკრაინელ ტყვეებში.
დღეს უკრაინის შინაგან საქმეთა მინისტრის მრჩეველმა, ვადიმ დენისენკომ თქვა, რომ კარგი იქნება გაცვლამდე მედვედჩუკისგან ინფორმაციის მიღება.
