ამერიკული გამოცემა Washington Post-ის ინფორმაციით აშშ-ის ადმინისტრაციის წარმომადგენლები სულ უფრო ხშირად ეუბნებიან უკრაინის ხელისუფლებას, რომ ომი გარდამტეხ მომენტშია და უკრაინის შეიარაღებულმა ძალებმა უნდა უზრუნველყონ მაქსიმალური წარმატება ბრძოლის ველზე მანამ, სანამ ისინი იღებენ დასავლური დახმარების დიდ მოცულობას.
გაზეთების წყაროების თანახმად, ბაიდენის ადმინისტრაცია თვლის, რომ კიევისთვის დასავლური დახმარების უახლესი პაკეტი კონფლიქტში გარდატეხის საუკეთესო შანსს იძლევა. მომავალი შეიძლება არ იყოს ისეთი ხელსაყრელი, რადგან ზოგიერთი რესპუბლიკელი აპირებს უკრაინის მხარდაჭერის შემცირებას, ევროპის გადაწყვეტილება კი, შეინარჩუნოს დახმარების მიწოდება იმავე დონეზე გრძელვადიან პერსპექტივაში, არც ისე ნათელია.
”ჩვენ მომავალშიც კვლავ ავუხსნით მათ, რომ ჩვენ არ შეგვიძლია აბსოლუტურად ყველაფრის გაკეთება განუსაზღვრელი ვადით”, – ციტირებს გაზეთი აშშ-ს მთავრობის ერთ-ერთი მაღალჩინოსნის განცხადებას, რომლის ვინაობა არ სახელდება.
The Washington Post იუწყება, რომ ბაიდენის ადმინისტრაცია მუშაობს კონგრესთან, რათა უკრაინას კიდევ 10 მილიარდი დოლარის პირდაპირი საბიუჯეტო დახმარება გაუწიოს.
მაგრამ, გაზეთი წერს, რომ უკრაინის მხარდაჭერის უზრუნველყოფა პოლიტიკურად უფრო რთული გახდება, როდესაც აშშ-ს კონგრესის მიერ დამტკიცებული დახმარების ამჟამინდელი პაკეტი დასრულდება,და ეს შეიძლება უკვე 2023 წლის ზაფხულში მოხდეს.
ბაიდენის ადმინისტრაციის წარმომადგენლების თქმით, ომის კრიტიკული მომენტი დადგება ამ გაზაფხულზე, როდესაც რუსეთი ახალ ფართომასშტაბიან შეტევას დაიწყებს და უკრაინას ექნება კონტრშეტევის შესაძლებლობა, რომელიც მიზნად ისახავს ტერიტორიების გათავისუფლებას. სწორედ მაშინ უნდა მიიღოს და გამოიყენოს კიევმა ახალი იარაღი, მათ შორის დასავლური ტანკები და ჯავშანტექნიკა.
სტატიაში ასევე ნათქვამია, რომ შეერთებულ შტატებსა და კიევს შორის იყო გარკვეული უთანხმოება საკითხზე, თუ როგორი მიდგომა უნდა იყოს საომარი მოქმედებების წარმოების მიმართ.
კერძოდ, უკრაინის შეიარაღებული ძალები დიდ რესურსებს ხარჯავენ დონეცკის ოლქის ქალაქ ბახმუტის დასაცავად. მაგრამ ამერიკელი სამხედრო ანალიტიკოსები არარეალურად მიიჩნევენ ერთდროულად ბახმუტის შენარჩუნებას და დიდი საგაზაფხულო კონტრშეტევის დაწყებას, აშშ-ს აზრით უფრო მნიშვნელოვანი ტერიტორიების დასაბრუნებლად, წერს გაზეთი. უკრაინის პრეზიდენტმა ვლადიმირ ზელენსკიმ ბახმუტს სიმბოლური მნიშვნელობა მიანიჭა, განუცხადა ბაიდენის ადმინისტრაციის ორმა მაღალჩინოსანმა გაზეთს.
აშშ-ის მთავრობის ერთ-ერთი წარმომადგენლის თქმით, თუ რუსეთი ბახმუტს აიღებს, „ეს არ გამოიწვევს ბრძოლის ველზე სტრატეგიულ ცვლილებებს“. ”რუსები შეეცდებიან ეს ასე წარმოაჩინონ, მაგრამ სინამდვილეში ეს მხოლოდ წერტილია რუკაზე, რომელზეც მათ დახარჯეს წარმოუდგენელი რაოდენობით სისხლი და რესურსები”, – თქვა ოფიციალურმა წარმომადგენელმა.
The Washington Post ასევე საუბრობს უკრაინის მიერ 2014 წლის შემდეგ რუსეთის მიერ ოკუპირებული მთელი ტერიტორიის, მათ შორის ყირიმის დაბრუნების პრობლემაზე.
ახლა უკრაინის ხელისუფლების წარმომადგენლები ამტკიცებენ, რომ ნაკლებს ვერ დათანხმდებიან. მაგრამ ამერიკულმა დაზვერვამ, გამოცემის თანახმად, დაასკვნა, რომ უკრაინის არმიას ჯერ არ შეუძლია გაათავისუფლოს კარგად გამაგრებული ყირიმის ნახევარკუნძული, და სადაზვერვო სააგენტოებმა ნათლად განმარტეს ეს პოზიცია აშშ-ს კონგრესის რამდენიმე კომიტეტში.
უკრაინის შესაძლებლობებსა და სურვილებს შორის ამგვარმა შეუსაბამობამ გამოიწვია შიში ევროპაში, რომ ომი შეიძლება განუსაზღვრელი ვადით გაგრძელდეს , ამტკიცებს გაზეთი.
ამ ფონზე, ბაიდენის თანამშრომლები აცხადებენ, რომ ისინი ცდილობენ იმოქმედონ ყველაზე გონივრული გზით: გააკეთონ ყველაფერი, რათა უკრაინამ დაიბრუნოს რაც შეიძლება მეტი ტერიტორია უახლოეს მომავალში და შემდეგ შეძლოს რუსეთთან მოლაპარაკებების დაწყება– ასკვნის გამოცემა.
