ენმ-ს და ძალა ერთობაშიას მაჟორიტარობის კანდიდატი, ქართული ოცნების ყოფილი წევრი, კახა ოქრიაშვილი ამბობს, რომ პოლიტიკაში დამოუკიდებლად მოვიდა.
“მე მინდა, გითხრათ, რომ მე ყოველთვის დამოუკიდებელი პოლიტიკოსი ვიყავი და დამოუკიდებელი პიროვნება ვიყავი. დამოუკიდებლად მოვედი პოლიტიკაში პარტიების დახმარების გარეშე, საინიციატივო ჯგუფის მეშვეობით. 2008 წლამდე არცერთ ფრაქციაშიც არ ვყოფილვარ, ალბათ, ერთადერთი დეპუტატი ვიყავი, რომელიც უფრაქციოდ დავრჩი. ჩემი მაღალი რეიტინგის გამო შემომთავაზეს ნაციონალური მოძრაობიდან კენჭისყრა 2008 წელს, მაშინ 95%-მდე ავიღე დმანისის მუნიციპალიტეტში”,- თქვა ოქრიაშვილმა ტვ პირველის ეთერში.
მანვე აღნიშნა, რომ ყველა პარტია ყოველთვის “ეკიდა”.
“ყოველთვის პარტიები მოდიოდნენ ჩემთან და მე პარტიებთან არ მივდიოდი რაღაც თხოვნებით, იმის გამო, რომ ყოველთვის მაღალი რეიტინგი მქონდა და გარანტირებულად ვიმარჯვებდი იმ მუნიციპალიტეტებში, საიდანაც ვიყრიდი კენჭს. ეს ერთი, მეორე, ახლა ხშირად იძახიან, რომ კახა ოქრიაშვილი ერთი პარტიიდან მეორეში გადავიდა და ახლა მეორედან… პარტიული არასდროს ვყოფილვარ და ბოდიში სლენგისთვის, სუ მეკიდა ყოველთვის ყველა პარტია. ახლა უკვე ვეღარ ვიტყვი ამას, იმიტომ, რომ ორი თვეა პარტიული გავხდი, მე და ცეზარ ჩოჩელმა ჩვენი პარტია დავაფუძნეთ “პროგრესი და თავისუფლება”,- განაცხადა კახა ოქრიაშვილმა.
