თბილისის სააპელაციო სასამართლოს მოსამართლეს და იუსტიციის უმაღლესი საბჭოს წევრს, ლევან მურუსიძეს ბრიტანეთის სანქციების შემდეგ სახელფასო ბარათი დაებლოკა. ინფორმაციას მურუსიძე “პირველებს” უდასტურებს.
- ”ერთადერთი რაც დამებლოკება ეს არის სახელფასო ბარათი, მაგრამ ხელფასს რამენაირად ავიღებ. ვერ წარმომიდგენია, რომ ხელფასი ვერ ავიღო.”- აცხადებს “ტვ პირველთან” ინტერვიუში ლევან მურუსიძე.
იუსტიციის უმაღლესი საბჭოს წევრი ჟურნალისტის დამაზუსტებელ შეკითხვას, როდის დაებლოკა ბარათი პასუხობს, რომ სახელფასო ბარათს უკვე ვეღარ იყენებს:
- ”სახელფასო ბაარათი დამებლოკა, როდის დამებლოკა რა მნიშვნელობაა აქვს, დეტალებია ეს”- განაცხადა სანქცირებულმა მოსამართლემ.
დიდი ბრიტანეთის საგარეო საქმეთა სამინისტრომ 2 აპრილიდან განაახლა სანქცირებული პირების სია. სიას 13 ჩანაწერი დაემატა. ბრიტანეთის სანქციების ქვეშ მოექცა თბილისის სააპელაციო სასამართლოს თავმჯდომარე მიხეილ ჩინჩალაძე, ვინაიდან მასთან დაკავშირებით არსებობს გონივრული ეჭვი, რომ გარეული იყო კორუფციულ გარიგებებში. ასევე თბილისის სააპელაციო სასამართლოს მოსამართლეს და იუსტიციის უმაღლესი საბჭოს წევრს, ლევან მურუსიძეს. სანქციების დაწესების საფუძვლად მითითებულია, რომ არსებობს გონივრული საფუძველი ეჭვისთვის, რომ მურუსიძე ჩართული იყო და არის კორუფციულ გარიგებებში.
