თბილისის მერი, კახა კალაძე ელექტროსკუტერების გაზიარების სერვისზე ამბობს, რომ ყველა ტრანსპორტს თავისი მომხმარებელი ჰყავს და გააჩნია, ,,ვისთვისაა ძვირი”.
“გააჩნია ვისთვისაა [ძვირი] ვიღაცისთვის შეიძლება იყოს ძვირი, ვიღაცისთვის მისაღები. მე ამიტომ ვამბობ, რომ ყველა ტრანსპორტს თავისი მომხმარებელი. ვიღაცისთვის ტაქსი ძვირია და ის სარგებლობს საზოგადოებრივი ტრანსპორტით, მეტროთი და ავტობუსით. ვიღაცისთვის არაა ძვირი და გადაადგილდება ტაქსით. მომავალში ექნებათ ველოსიპედები. ადამიანებს ექნებათ არჩევანი”, — ამბობს თბილისის მერი.
კითხვაზე, ძვირია თუ 22 ლარი 1 საათით სკუტერის ქირაობისთვის, კალაძე პასუხობს,რომ ეს ტრანსპორტი მხოლოდ მოკლე მანძილზე გადაადგილებისთვისაა.
,,ყველაფერი შედარებითია, თუ შევადარებთ ევროპულ ქვეყნებს ექვსჯერ იაფია საქართველოში. არ ვიცი ადამიანმა 1 საათი სად უნდა მოიხმაროს სკუტერი. ხაშურში წასვლას თუ აპირებს, მე ამას არ ვურჩევ და ეს არაა მიზანშეწონილი. ეს არის მოკლე მანძილებზე გამოსაყენებელი. ეს არის მოკლე მანძილისთვის, ავტობუსის გაჩერებაზე ჩამოხვედი და გინდა, სახლამდე მიხვიდე”,- ამბობს კალაძე.
გუშინ თბილისში ელექტროსკუტერების გაზიარების სერვისი ამოქმედდა. მერია 1000 ერთეული სკუტერი ჩამოიყვანა, რომლით გადაადგილება, პირველი წუთი ლარი ღირს, ხოლო შემდეგ ყველა წუთი 35 თეთრი.
