საქართველოს მთავარი პროკურატურის ინფორმაციით, გენდერული დისკრიმინაციის ნიშნით ცოლის წამებისთვის ბრალდებულ კაცს 7 წლით თავისუფლების აღკვეთა მიესაჯა.
შემთხვევა 2020 წლის 13 იანვარს, ფოთში მოხდა.
“შინაგან საქმეთა სამინისტროს მიერ ჩატარებული გამოძიების შედეგად, ბრალდების მხარის მიერ სასამართლო პროცესზე წარდგენილი მტკიცებულებებით დადასტურდა, რომ 2020 წლის 13 იანვარს ქ. ფოთში, ზ.შ.-მ ეჭვიანობის ნიადაგზე, გენდერული დისკრიმინაციის მოტივით, მეუღლის მიმართ წამება განახორციელა, რა დროსაც დანით მიაყენა ჭრილობები და სიცოცხლის მოსპობით დაემუქრა”, – აცხადებს პროკურატურა.
ფოთის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და გენდერული დისკრიმინაციის ნიშნით ცოლის წამების ფაქტზე ბრალდებული ზ.შ. დამნაშავედ ცნო.
