გერმანიამ და აზერბაიჯანმა ორმხრივი პარტნიორობისა და ურთიერთნდობაზე დაფუძნებული თანამშრომლობის გაღრმავების საერთო სურვილი დაადასტურეს. ამის შესახებ ნათქვამია განცხადებაში, რომელიც სამშაბათს, 21 ივლისს, ბერლინში გერმანიის კანცლერ ფრიდრიხ მერცისა და აზერბაიჯანის პრეზიდენტ ილჰამ ალიევის შეხვედრის შემდეგ გამოქვეყნდა.
გერმანია მომავალში ბაქოსგან მეტი გაზის შეძენას აპირებს.
„მას შემდეგ, რაც ოთხ-ნახევარი წლის წინ რუსეთისგან გაზის მიღება შევწყვიტეთ, ბუნებრივია, მიწოდების ახალ წყაროებს ვეძებთ და ამ მხრივ აზერბაიჯანი მნიშვნელოვან როლს ასრულებს“, — განაცხადა მერცმა.
მისი თქმით, აზერბაიჯანი რეგიონში ერთ-ერთი იმ მცირერიცხოვანი ქვეყანაა, რომელიც იმაზე მეტ ენერგიას აწარმოებს, ვიდრე თავად მოიხმარს.
„ამ თვალსაზრისით, გერმანიის ენერგომომარაგების უზრუნველყოფის საკითხში აზერბაიჯანი ჩვენთვის საინტერესო პარტნიორია“, — დასძინა გერმანიის მთავრობის მეთაურმა.
მისი თქმით, საუბარია, მათ შორის, გერმანიის სამხრეთ ნაწილზე, რადგან ამ რეგიონში საჭირო ინფრასტრუქტურა უკვე არსებობს ან მისი გაფართოებაა შესაძლებელი.
ენერგორესურსების იმპორტის დივერსიფიკაცია
გერმანიის კანცლერმა აღნიშნა, რომ აზერბაიჯანიდან ენერგორესურსების იმპორტი უფრო მრავალფეროვანი უნდა გახდეს და გაზთან ერთად წყალბადსაც მოიცავდეს.
ენერგოეფექტიანობის საკითხებს ერთობლივ დეკლარაციაში ცალკე ნაწილი ეთმობა. დოკუმენტის თანახმად, ბერლინი და ბაქო გააგრძელებენ ვაჭრობისა და ინვესტიციების საკითხებზე გერმანულ-აზერბაიჯანული მაღალი დონის სამუშაო ჯგუფის საქმიანობას, რათა ხელი შეუწყონ ორმხრივი ეკონომიკური ურთიერთობების განვითარებას.
სააგენტო dpa-ს ცნობით, ამ დროისთვის გერმანიაში აზერბაიჯანული გაზის მიწოდების შეთანხმებული წლიური მოცულობა 1,5 მილიარდ კუბურ მეტრს შეადგენს.
ბერლინში ალიევმა იმედი გამოთქვა, რომ მიწოდების მოცულობა გაიზრდება, თუმცა აღნიშნა, რომ ამისთვის შესაძლოა დამატებითი გაზსადენების მშენებლობა გახდეს საჭირო.
მერცი აზერბაიჯანსა და სომხეთს შორის სამშვიდობო შეთანხმებაზე
ფრიდრიხ მერცმა ილჰამ ალიევს ასევე მიულოცა 2025 წელს სომხეთთან სამშვიდობო შეთანხმების გაფორმება, რომელსაც აშშ-ის პრეზიდენტი დონალდ ტრამპი ესწრებოდა.
„ეს ისტორიული შეთანხმება ათწლეულების განმავლობაში მიმდინარე კონფლიქტის დასრულების შესაძლებლობას ქმნის“, — განაცხადა კანცლერმა.
მისი თქმით, რეგიონში სტაბილურობის ზრდა ეკონომიკური თანამშრომლობის გაძლიერებისთვისაც ხელსაყრელ პირობებს ქმნის.
რუსეთისა და გერმანიის წარმომადგენლების ფარული შეხვედრა ბაქოში
DW-ის შეკითხვის პასუხად აზერბაიჯანის პრეზიდენტმა ირიბად დაადასტურა, რომ ბაქოში რუსეთისა და გერმანიის წარმომადგენლები შეხვდნენ, თუმცა აღნიშნა, რომ აზერბაიჯანის ხელისუფლებამ ამის შესახებ არაფერი იცოდა.
მედიის ინფორმაციით, გასულ კვირას გერმანიის მცირე დელეგაცია, რომელშიც შედიოდნენ კანცლერის ადმინისტრაციის ყოფილი ხელმძღვანელი რონალდ პოფალა და ბრანდენბურგის ყოფილი პრემიერ-მინისტრი მატიას პლატცეკი, ბაქოში ვლადიმერ პუტინის რამდენიმე თანამოაზრეს ფარულად შეხვდა.
გავრცელებული ცნობებით, რუსეთის მხრიდან შეხვედრას ესწრებოდნენ რუსეთის პრეზიდენტთან არსებული სამოქალაქო საზოგადოებისა და ადამიანის უფლებების საბჭოს თავმჯდომარე ვალერი ფადეევი და „გაზპრომის“ სამეთვალყურეო საბჭოს თავმჯდომარე ვიქტორ ზუბკოვი.
ფადეევი ევროკავშირის სანქციების ქვეშ იმყოფება უკრაინაში რუსეთის შეჭრის გასამართლებლად „დეზინფორმაციისა და პროპაგანდის“ გავრცელების გამო.
ალიევის განცხადებით, შეხვედრის შესახებ მან გაზეთ The Times-იდან შეიტყო და ინფორმაცია აზერბაიჯანის სასაზღვრო სამსახურისგან გამოითხოვა.
პრეზიდენტის თქმით, შეხვედრის მონაწილეები ქვეყანაში 12-დან 14 ივლისამდე იმყოფებოდნენ.
„ჩვენი ტერიტორია ჩვენი ინფორმირების გარეშე გამოიყენეს“, — განაცხადა ალიევმა და დასძინა, რომ მსგავსი კონტაქტები მხოლოდ მისასალმებელია, თუკი ისინი რუსეთის მიერ უკრაინის წინააღმდეგ დაწყებული ომის დასრულებას შეუწყობს ხელს.
ფრიდრიხ მერცმაც განაცხადა, რომ შეხვედრის შესახებ არაფერი იცოდა. მისი თქმით, ბერლინი უკვე თვეებია უშედეგოდ ცდილობს პუტინის დაყოლიებას მოლაპარაკებაზე, რომელიც ომის დასრულებას შეუწყობდა ხელს.
