გერმანიის ფინანსთა მინისტრი, კრისტიან ლინდერი ბლოკავს ევროკავშირის ტრანშს უკრაინისთვის 9 მილიარდი ევროს მოცულობით, საიდანაც ჩინოვნიკმა მხოლოდ 1 მილიარდი ევროს გაცემაზე განაცხადა თანხმობა.
ამის შესახებ ესპანური მედია საკუთარ წყაროებზე დაყრდნობით წერს.
მედიის ინფორმაციით, გერმანიის ფინანსთა მინისტრი წინააღმდეგია უკრაინას თანხა საერთო ევროპული ვალის გზით გამოეყოს, როგორც ეს კორონავირუსის პანდემიის დროს მოხდა.
უკრაინული მთავრობა არაერთხელ აცხადებდა, რომ ომის განმავლობაში ბიუჯეტის ყოველთვიური დანაკლისი 5 მილიარდი დოლარია. სწორედ ეს თანხა მოითხოვა უკრაინამ პარტნიორებისგან.
ლინდერი საკუთარი პოზიციის მოტივად იმას ასახელებს, რომ სექტემბერში უკრაინამ შეიძლება 900 მილინი ევროს საგარეო ვალი ვერ გადაიხადოს. ჟურნალისტების აზრით, სწორედ ტრანშის შეჩერება შეიძლებოდა გამხდარიყო გერმანიაში უკრაინის ელჩის, ანდრეი მელნიკის თანამდებობიდან გათავისუფლების მიზეზი. თუმცა, შესაძლოა ეს სიმართლე არც იყოს: მანამდე გამოცემა Bild ამტკიცებდა, რომ დიპლომატი ახალ თანამდებობაზე – საგარეო საქმეთა მინისტრის მოადგილედ გადაყავთ.
შეგახსენებთ, რომ ევროკომისიამ კიევს ფინანსური დახმარების პაკეტი 9 მილიარდი ევროს მოცულობით ჯერ კიდევ გაზაფხულზე შესთავაზა. შემდეგ ტრანში ევროკავშირის წევრი სახელმწიფოების ლიდერებმა დაამტკიცეს.
ფული უკრაინას 25 წლიანი უპროცენტო კრედიტის სახით უნდა გადასცემოდა იმ სახსრების ხარჯზე, რომლებიც ევროკომისიამ ევროპის ქვეყნების გარანტიით ობილიგაციების ბაზარზე გამოშვების გზით შეაგროვა.
პირველი ტრანში 1 მილიარდი ევროს მოცულობით ევროპარლამენტმა 7 ივლისს დაამტკიცა.
