“გვაქვს ინფორმაცია მედიაზე, დამკვირვებლებზე თავდასხმების, ასევე ფიზიკური დაპირისპირებისა და სხვადასხვა ფაქტის შესახებ – მოვუწოდებ ყველას სიმშვიდისკენ”- ამის შესახებ საქართველოში აშშ-ს ელჩმა კელი დეგნანმა, თვითმმართველობის არჩევნების მეორე ტურთან დაკავშირებით განაცხადა.
„ჩვენ გვყავს საელჩოს 26 გუნდი საქართველოს მასშტაბით და ისინი ძალიან განსხვავებულ მოვლენებს ხედავენ ქვეყნის ზოგიერთ ნაწილში. გვაქვს ინფორმაცია მედიაზე, საარჩევნო დამკვირვებლებზე თავდასხმების განხორციელების შესახებ, ასევე ფიზიკური დაპირისპირებისა და სხვადასხვა ფაქტების შესახებ. მოვუწოდებ ყველას სიმშვიდისკენ, რადგან მნიშვნელოვანია, რომ ამომრჩევლებს უსაფრთხო გარემოში ხმის მიცემის საშუალება ჰქონდეთ. ეს არჩევნები ასევე არის შესაძლებლობა, რომ ვიხილოთ, როგორ მუშაობს გასულ ზაფხულში მიღებული საარჩევნო რეფორმები. ჩვენ ვნახეთ გარკვეული გაუმჯობესება, მაშ შორის გადათვლის სისტემა, ძალიან მნიშვნელოვანია, რომ ამომრჩეველს ჰქონდეს არჩევნების შედეგების მიმართ ნდობა და ქვეყანამ შეძლოს წინსვლა. საარჩევნო რეფორმებთან დაკავშირებით საქართველოს პოლიტიკურ ლიდერებს შორის შეთანხმება მოხდა. ეს იყო ძალიან წარმატებული მაგალითი იმისა, რომ ლიდერები, ძალიან განსხვავებული პარტიებიდან გამოდიან ერთად, იღებენ გადაწყვეტილებას საქართველოს უკეთესი საარჩევნო პროცესისთვის და შეაქვთ წვლილი საარჩევნო პროცესის გაუმჯობესებაში. ყველა არჩევნები არის ნაბიჯის წინ გადადგმის შესაძლებლობა, ნაბიჯ-ნაბიჯ და იმედი მაქვს, რომ ჩვენ ამას ვიხილავთ დღეს და ხვალ,“- აღნიშნა ელჩმა.
