„საქართველოს პარლამენტის წევრების მიხეილ სააკაშვილთან შეხვედრის შესახებ გუშინ მე რომ ვთქვი, რაღაცნაირად იმედი მქონდა, მიხეილ სააკაშვილის გუნდის შიგნით მაინც ექნებოდა ამ პროცესს გამოხმაურება. ფაქტობრივად, ირღვევა როგორც პატიმრის, ასევე საქართველოს პარლამენტის წევრების უფლებები. პოლიტიკურ წელს, როცა არჩევნები უნდა ჩატარდეს, არ გვეძლევა მიხეილ სააკაშვილთან შეხვედრის შესაძლებლობა, გავიგოთ, რა უნდა მას და რა უნდა „ნაციონალურ მოძრაობას“. იმიტომ, რომ თუ მიხეილ სააკაშვილთან რამეს არ გაარკვევ, სხვანაირად სრულყოფილად იცოდე და ადამიანებს გადასცე, რა უნდა მიხეილ სააკაშვილს და „ნაცმოძრაობას“, შეუძლებელია. შეუძლებელია ასევე გამოვთქვათ მოსაზრება რა გაიაზრა მიხეილ სააკაშვილმა, რასთან დაკავშირებით შეიძლება მასთან თანამშრომლობა, რასთან არ შეიძლება. ჩემი აზრით, თუ რაიმე პოლიტიკური დარღვევა ხდება საარჩევნო წელს, ხდება ის, რომ ქვეყანაში გვყავს დიდი ოპოზიციური ძალის რეალური ლიდერი, რომელიც გამოკეტილია ციხეში და მას არ ეძლევა კომუნიკაციის საშუალება როგორც თანაგუნდელებთან, ასევე არ აქვთ სხვა პოლიტიკურ პარტიებს მასთან ურთიერთობის შესაძლებლობა. ამით ხდება პოლიტიკური პროცესების დაბლოკვა. ჩვენ ფიზიკურად ვერ ვიგებთ რა უნდა „ნაციონალურ მოძრაობას“ და წლის ბოლომდე შეუძლებელი ხდება ამის გაგება. მიგვაჩნია, რომ მას თქვენ, „ქართულმა ოცნებამ“ წაართვით მედიასაშუალებები, ახლა თქვენ აკონტროლებთ მას და სწორედ ამიტომაა, რომ მიხეილ სააკაშვილის საკითხი მეათასე საკითხზეა და არავინ აპროტესტებს იმას, რომ ასე ადამიანისგან მიუწვდომლადაა გამოკეტილი. ჩემი აზრით, მას წაართვით პოლიტიკური პარტიის უდიდესი ნაწილი. დარწმუნებული ვარ, მისი პარტიის ზოგი წევრი გულწრფელია მასთან დამოკიდებულებაში. ის, რომ მისი პარტია ეგუება იმას, რომ მიხეილ სააკაშვილთან შეხვედრის საშუალება არ აქვთ, შეუძლებელი მგონია თქვენ მათთან არ შეთანხმებულიყავით. მიხეილ სააკაშვილი არის სიტუაციაში, როცა თქვენ მას წაართვით მედიასაშუალება და პოლიტიკური პარტია. ახლა კი თქვენვე აცხადებთ, რომ ის არის ოპოზიციის რეალური ლიდერი, თქვენვე აცხადებთ იმას, რომ იქიდან მართავს სიტუაციას, თქვენვე აცხადებთ, რომ ჯანმრთელია, თქვენვე აცხადებთ, რომ მონაწილეობს და არსად წასულა პოლიტიკური პროცესიდან და ის არის თქვენი მთავარი მოწინააღმდეგე. მინდა მივმართო „ნაციონალურ მოძრაობას“, მიხეილ სააკაშვილის პარტიას, საერთაშორისო თანამეგობრობას, პარტნიორებს, რომ წინასაარჩევნო წელს პოლიტიკური პროცესები თქვენ მიერ ხელოვნურად ფერხდება იმის გამო, რომ აქტიურ პოლიტიკურ მოთამაშედ აცხადებთ ადამიანს და მას არავის აკარებთ, მისი აზრი ფაქტობრივად მიუწვდომელია საზოგადოებისთვის. ჩვენც არ გვაძლევთ საშუალებას შევხვდეთ მიხეილ სააკაშვილს და საზოგადოებას ვუთხრათ, შევხვდით, ველაპარაკეთ, ამაში დავუჯერეთ, ამაში არ დავუჯერეთ. მინდა აქედან დაველაპარაკო მიხეილ სააკაშვილს, სხვა გზა რომ არ მაქვს და ვუთხრა, რომ მისი პარტიის უდიდესი ნაწილი გადაბირებულია თქვენ მიერ, მისი მედიებისა და ჟურნალისტების უდიდესი ნაწილი გადაბირებულია თქვენ მიერ და ჩემი აზრით, გონთ უნდა მოეგოთ, სცადოთ კომუნიკაცია სხვა პოლიტიკურ ძალებთან იმისთვის, რომ თქვენი მდგომარეობა არჩევნების შემდეგ იგივე არ დარჩეს“,
ასე მიმართა პარლამენტის პლენარულ სხდომაზე სიტყვით გამოსვლისას „გირჩის“ დეპუტატმა იაგო ხვიჩიამ საქართველოს მესამე პრეზიდენტს მიხეილ სააკაშვილს.
