ქალი, რომელსაც რუსეთი დარია დუგინას მკვლელად აცხადებს, მოკლული იპოვნეს. ამის შესახებ ინფორმაციას რუსული ტელეგრამ არხები ავრცელებენ და წერენ, რომ ნატალია ვოვკი, იგივე ნატალია შაბანი, რომელიც რუსული ძალოვანი უწყებების თქმით დარია დუგინას მკვლელია, და რომელიც მათივე მტკიცებით აზოვის წევრია, ნაქირავებ ბინაში გარდაცვლილი იპოვნეს. ტელეგრამ არხები ავრცელებენ მოკლული ქალის კადრებს თითქოსდა შემთხვევის ადგილდან და წერენ, რომ მას დანით 17 ჭრილობა ქონდა მიყენებული, ხელში კი წერილი ეჭირა. მისი შვილის ადგილსამყოფელი უცნობია. სხვა დეტალები არ კონკრეტდება.
ასევე, ვოვკის გარდაცვალების შესახებ ინფორმაცია გამოაქვეყნა ავსტრიულმა გამოცემა EXXpress–მა, რომელიც საეჭვო რეპუტაციით სარგებლობს და პოზიციონირებს როგორც ყვითელი პრესა. პუბლიკაციაში ნათქვამია, რომ დუგინას სავარაუდო მკვლელი ავსტრიულ სასტუმროში დანით მიყენებული 17 ჭრილობით იპოვნეს. გამოცემამ თითქოსდა შემთხვევის ადგილიდან ფოტოები გამოაქვეყნა, თუმცა ფოტო საბოლოოდ ძველი აღმოჩნდა და გაირკვა, რომ მასზე არა დუგინას სავარაუდო მკვლელი, არამედ 26 წლის მოსკოველი გოგოა ასახული, რომელიც 2020 წელს მოკლეს. ეს ფოტოები რუსული მედიის ძველ პუბლიკაციებს ახლავს თან, სადაც საუბარია, რომ საქმრომ საცოლე ქორწილამდე რამდენიმე დღით ადრე მოკლა.
შეგახსენებთ, რომ მოსკოვის ოლქში რუსი პროპაგანდისტის ალექსანდრ დუგინის მანქანა 20 აგვისტოს ააფეთქეს, რომელშიც მისი შვილი დარია დუგინა იმყოფებოდა.
29 წლის დარია დუგინა ადგილზე გარდაიცვალა. რუსული „ეფესბეს“ მტკიცებით, დანაშაული მოამზადა და ჩაიდინა უკრაინის სპეცსამსახურებმა, ხოლო დამნაშავე ნატალია ვოვკია, რომელიც რუსეთში 23 ივლისს ჩავიდა 12 წლის ქალიშვილთან ერთად და იქირავა ბინა იმ სახლის მეზობლად, სადაც დარია დუგინა ცხოვრობდა. რუსულმა მხარემ განაცხადა, რომ ვოვკი „აზოვის“ პოლკში მსახურობდა, თუმცა „აზოვმა“ ეს ინფორმაცია უარყო.
რუსული სპეცსამსახურების ინფორმაციით დუგინას მკვლელობის შემდეგ ქალი ესტონეთში წავიდა საკუთარი მანქანით, რომელსაც უკრაინული ნომრები ქონდა.
