დაუმორჩილებლობის მარში თბილისში: 21 საათზე მოძრაობა სირცხვილიას ორგანიზებით პარლამენტის წინ დაწყებული დაუმორჩილებლობის აქცია ამ დროისთვის დედა ენის ბაღში გრძელდება. სამოქალაქო აქტივისტები პარლამენტის წინ კომენდანტის საათის დაწყებამდე შეიკრიბნენ. მათი მთავარი მოთხოვნა „კომენდანტის საათის” გაუქმება და არსებული რეგულაციების მოხსნაა. სამოქალაქო აქტივისტებს შეუერთდნენ ბიზნეს სექტორის წარმომადგენლები და პოლიტიკოსებიც.
“ბევრი ადამიანი ვიქნებით თუ ცოტა, არ ვიცი, მაგრამ ფაქტია, რომ დღეს „კომენდანტის საათს“ რამდენიმე ათეული ან რამდენიმე ასეული ადამიანი დაარღვევს ერთად. პირობას ვიძლევდით, არცერთი კანონი არ დაირღვევა, გარდა უაზრო რეგულაციისა, რომელიც პირდაპირ ანგრევს და კლავს ბიზნესს. ამ რეგულაციებით ხელისუფლება პირდაპირ ანგრევს ყველა იმ სფეროს, რომელიც ოდნავ მაინც ცოცხლობს და პირდაპირ შიმშილისთვის იმეტებს ადამიანებს. დღეს 9 საათზე ყველა ერთად დავიძვრებით და დავარღვევთ „კომენდანტის საათს“, ვივლით თბილისის ქუჩებში. წინ მშვენიერი, ფერადი, ხალისიანი და მუსიკალური საღამო გველოდება”, – განაცხადა სამოქალაქო აქტივისტმა, გიგა მაქარაშვილმა.
აქციის მონაწილეებს სიმბოლურად სხვადასხვა ნივთები მიიტანეს, მათ შორის: ნიღბები, პარაპლანი, ბუშტები და დოლი.
დეპუტატ ელენე ხოშტარიას განცხადებით, “როდესაც ხელისუფლება თავის ძალაუფლებას ბოროტად იყენებს, ერთადერთი გზა დაუმორჩილებლობა ხდება”.
“მაშინ, როდესაც ხელისუფლება თავის ძალაუფლებას იყენებს ბოროტად და გადასულია ადამიანების პოლიტიკური უფლებების შეზღუდვაზე, ასევე აბსოლუტურად არ ითვალისწინებს ეკონომიკურ ზიანს, რომელიც ადგება ადამიანებს, ერთადერთი იარაღი რჩება დაუმორჩილებლობა და ამიტომ, ჩვენ ვართ იმ ადამიანების გვერდით, ვინც აცხადებს დაუმორჩილებლობას. ყველა პროტესტს აქვს აზრი და შედეგი. მე არ მაინტერესებს, რო
დის მოუწევთ ამის გაკეთება, მე მაინტერესებს, რომ ყოველ ჯერზე, როდესაც არის ლეგიტიმური მიზეზი, გავაპროტესტო და მოვითხოვო ის, რაშიც ვარ მართალი. არ არსებობს პროტესტი, რომელსაც არ მოყვება შედეგი”, -განაცხადა ხოშტარიამ.
პარლამენტის მიმდებარე ტერიტორიიდან დაუმორჩილებლობის მარშმა მსვლელობა რუსთაველის გამზირზე დაიწყო. სამართალდამცავები აქციის მონაწილეებს თავდაპირველად გზის სავალ ნაწილზე გადასვლის უფლებას არ აძლევდნენ, მცირე დაპირისპირების შემდეგ, „დაუმორჩილებლობის მარშის“ მონაწილეებს სამართალდამცავებმა გზის სავალი ნაწილის ცალ მხარეს მოძრაობის ნება დართეს.
საპატრულო პოლიციის დეპარტამენტის უფროსის ვაჟა სირაძის განცხადებით, აქციის მონაწილეების მიმართ, ვინც კანონს არღვევს, სამართლებრივი ზომები იქნება გამოყენებული.
როგორც სირაძემ აღნიშნა, კანონის წინაშე ყველა თანასწორია.
„სამართლებრივი ზომები მიღებული იქნება ყველა ფაქტზე, როგორც წინაზე. კანონს ვინც დაარღვევს, შესაბამის ზომებს მივიღებთ. კანონის წინაშე ყველა არის თანასწორი“, – განაცხადა სირაძემ.
აქციის მონაწილეებმა მსვლელობა რუსთაველის გამზირიდან ელბაქიძის ხიდის გავლით თბილისის სხვადასხვა ქუჩებში გამართეს, თუმცა მსვლელობის მარშრუტი წინასწარ არ დაუზუსტებიათ.
ბოლოს გაირკვა, რომ სამოქალაქო აქტივისტების განცხადებით, “დაუმორჩილებლობის მარშის” ერთ-ერთი მთავარი ლოკაცია “დედაენის ბაღია”. როგორც სამოქალაქო აქტივისტმა გიგა მაქარაშვილმა განაცხადა, რამდენიმე გასართობი “ფერადი და მხიარული სიურპრიზი” აქვთ მომზადებული.
მისივე თქმით, “ისინი არაფრის გაფუჭებას არ აპირებენ”.
