ბიზნესმენ გოგი თოფაძის შვილიშვილი ლევან თოფაძე 2 აგვისტოს საკუთარ სახლში დაჭრეს, რაშიც ბრალდებულია ყოფილი პრემიერ-მინისტრის, ზურაბ ჟვანიას შვილი ბუსა ჟვანია. მისი სასამართლო პროცესი 24 სექტემბერს უნდა გამართულიყო, თუმცა ნოემბრისთვის გადაიდო.
ბუსა ჟვანიას აღკვეთის ღონისძიების სახით პატიმრობა აქვს შეფარდებული. შსს-ს ცნობით, გამოძიებით დადგინდა, რომ ბრალდებულმა ურთიერთშელაპარაკების ნიადაგზე, ლევან თოფაძეს მისსავე საკუთარ საცხოვრებელ სახლში, ცივი იარაღით სხეულზე რამდენიმე ჭრილობა მიაყენა.
გოგი თოფაძე Ambebi.ge-სთან საუბრისას ამბობს, რომ მის შვილიშვილს მარცხენა ფეხში მგრძნობელობა ისევ არ აქვს, ამიტომ გერმანიაში აპირებენ მის წაყვანას.
“ნუ ნერვიულობს ბუსას დედა, რომელსაც გასაგებია, აწუხებს თავისი შვილის ამბავი. იცით, რომ მას დანაშაულისთვის 7-დან 15 წლამდე პატიმრობა ემუქრებოდა. რადგან ახალგაზრდა კაცია, უკან დავიხიეთ, ახლა კვალიფიკაცია შეიცვლება ალბათ და 3-დან 6 წლამდე სასჯელი ემუქრება.
დედამისი 1-2-ჯერ იყო ჩემთან მოსული და ვუთხარი, – კინაღამ ბავშვი მომიკლა-მეთქი… ღამის 5 საათზე შემოვარდა, მე-4 სართულზე ავარდა, ატეხა ბათქა-ბუთქი, ძლივს გადარჩა ლევანიკო, სამი დღე რეანიმაციაში იყო. სასამართლო 24 სექტემბერს უნდა ყოფილიყო, ახლა ნოემბერში გადაიტანეს. კი ბატონო, იყოს, მაგრამ მეტს ნურაფერს ელიან. დედას “ვუნამიოკე”, ეყოფა, რაც ჩაიდინა შენმა შვილმა – მეთქი. რამდენი კაცი უნდა დაჭრას კიდევ, 3-დან 6 წლამდე იყოს ციხეში. იჯდეს, მოჭკვიანდება. ახლა მთლად ვერ გადავყვებით მაგას, ბავშვი ჯერ კიდევ გადასარჩენად მყავს წასაყვანი. როგორც ყველა დედა, ქალბატონი ნინო წუხს. ბიჭმა რაღაც ხომ უნდა გაიგოს, დაჯდეს ცოტა ხანი, რომ მიხვდეს, ასე გაგრძელება აღარ შეიძლება”,- ამბობს თოფაძე.
ის ასევე აღნიშნავს, რომ როგორც ნინო ქადაგიძეს, ისე თვითონ, ბიძინა ივანიშვილთან ჰქონდათ კომუნიკაცია.
“დედამისი ივანიშვილთანაც მივიდა, ბიძინაც კი მესაუბრა ამ თემაზე. ჯობია, დროზე დავამთავროთ ეს ამბავი, გადაეცით, თორემ შეიძლება უფრო გაურთულდეს საქმე. რამდენჯერ გადადებენ სასამართლოს? ვიღაცებს რევენ და ალბათ ამიტომ დებენ პროცესს. ჩემგან მეტს ნურაფერს ელიან. საკმარის დათმობაზე წავედით, მაგათ კიდე გაამართლონ უნდათ, ასე არ გამოვა”,-უთხრა გოგი თოფაძეს ambebi.ge-ს.
