შინაგან საქმეთა მინისტრის მრჩეველმა, ვადიმ დენისენკომ განაცხადა, რომ უკრაინა-ბელარუსის საზღვარზე რუსული ჯარების კონცენტრაცია ჯერ არ შეინიშნება, ამიტომ, სავარაუდოდ, კიევსა და ჩერნიგოვზე შეტევა უახლოეს მომავალში არ იქნება, თუმცა სამომავლოდ ეს გამორიცხული არ არის.
“ჯერჯერობით, ჩვენ ვერ ვხედავთ რუსული ჯარების კონცენტრაციას ბელარუსის საზღვარზე. და იმის თქმა, რომ უახლოეს მომავალში არის შესაძლებლობა, რომ რუსებმა ბელარუსიდან განახორციელონ თავდასხმები ჩერნიგოვზე ან კიევზე, ჩვენ არ შეგვიძლია, ეს ასე არ არის. სამწუხაროდ, ამის გამორიცხვა არ შეიძლება მომავალში”,– თქვა დენისენკომ.
მისივე ცნობით, “ახლა ყველაფერი კონცენტრირებულია დონბასში”.
“მათ არ აქვთ ძალა, ერთდროულად ბევრ ფრონტზე იბრძოლონ. მიუხედავად იმისა, რომ მათ გარკვეული მობილიზაცია ჩაატარეს, სამწუხაროდ, ახლები შევიდნენ ბრძოლაში. მაგრამ მობილიზაცია, უპირველეს ყოვლისა, დონბასის გამო განხორციელდა“, – განაცხადა მინისტრის მრჩეველმა.
დენისენკომ ასევე აღნიშნა, რომ პუტინს ძალიან ეშინია რუსეთის ფედერაციის შიგნით მობილიზების, რადგან ესმის, რომ ამან შეიძლება გამოიწვიოს რუსებში არეულობის უზარმაზარი ტალღა.
ცნობისთვის, გუშინ უკრაინის პრეზიდენტის ადმინისტრაციის უფროსის მრჩეველმა, ალექსეი არესტოვიჩმა თქვა, რომ რუსეთმა უკრაინაზე სწრაფად მოახერხა რესურსების მოგროვება, ამიტომ შესაძლოა, რუსული არმია დაბრუნდეს ქვეყნის ჩრდილოეთით და გაზარდოს ზეწოლა ხერსონ-ზაპოროჟიეს ხაზზე.
