„ოპოზიცია ვგეგმავთ ვიზიტს უკრაინაში სამძიმრის სათქმელად, ბუჩას მოვლენებთან დაკავშირებით. მე ძალიან მესიამოვნა, რომ დღეს „ქართულმა ოცნებამ“ მიიღო გადაწყვეტილება, ამ ვიზიტს შემოუერთდეს და ამით ქვეყნის პოზიცია იქნება გამოხატული, მაგრამ მე მაინც ვფიქრობ, რომ ამ ვიზიტს და დელეგაციას უნდა უხელმძღვანელოს პარლამენტის თავმჯდომარემ. მე მას გამოჯანმრთელებას ვუსურვებ, მაგრამ ამავე დროს ვთხოვ, რომ დაივიწყოს, გვერდზე გადადოს ყველა პირადი თუ პარტიული წყენა – ბევრად უფრო დიდი რამე ხდება, ბევრად უფრო მნიშვნელოვანი საკითხია ეს ჩვენი ქვეყნისთვის და მოვა დრო, როდესაც დასრულდება ომი და მოგეცემათ საშუალება გაარკვიოთ თქვენი ურთიერთობა იმ პარტიასთანაც და ვისთანაც გნებავთ, მაგრამ ახლა ამის დრო არ არის. მე ვთხოვ შალვა პაპუაშვილს, რომ თავად ჩაუდგეს დელეგაციას სათავეში და წავიდეთ უკრაინაში და სამძიმარი ვუთხრათ უკრაინელ ხალხს და უკრაინის მთავრობას, რომელიც დღეს ძალიან დიდ ბრძოლაშია რუსეთის წინააღმდეგ“
ასე მიმართა პარლამენტის ვიცე-სპიკერმა და „მოქალაქეების“ წევრმა ლევან იოსელიანმა პარლამენტის თავმჯდომარეს შალვა პაპუაშვილს, ბიუროს სხდომაზე სიტყვით გამოსვლისას.
