“ოცნების” დეპუტატი ირაკლი ზარქუა დაუმორჩილებლობის აქციაზე მიხეილ სააკაშვილის განცხადებას ეხმიანება და უკრაინის პრეზიდენტს მოუწოდებს, სააკაშვილს “ლაგამი ამოსდოს”.
„ვოლოდიმირ ზელენსკის მივმართავ, იქნებ, თავის ჩინოვნიკს, მიხეილ სააკაშვილს ლაგამი ამოსდოს, რადგან უფრო არაადეკვატური გახდა. ადამიანი, რომელმაც საკუთარი ქვეყნის მოქალაქეობა დახია და შემდეგ უკრაინაში სახურავებზე დარბოდა, მერამდენე წელია, თავის მხარდამჭერებს დაუმორჩილებლობისკენ მოუწოდებს? ეს ნორმალური არ არის.
მიხეილ სააკაშვილის უაზრო განცხადებებზე კომენტარს ვერ გავაკეთებ. მის პოლიტიკურ ხელმძღვანელობასთან თხოვნა და მოთხოვნა მექნება, რომ იქნებ, ლაგამი ამოსდონ. სამართლებრივ სახელმწიფოში ვცხოვრობთ, სადაც კანონი უზენაესია, განურჩევლად სტატუსის, მრწამსის თუ რელიგიური მიმდინარეობის. ნებისმიერი ადამიანი, ვინც დადგენილ ნორმებს დაარღვევს, სანქციებს თუ ჯარიმებს დაექვემდებარება. სახელმწიფოს პროვოკაცია არ უნდა მოვუწყოთ და ინსტიტუციები არ უნდა ჩამოვშალოთ. ვინც ამაზე მიდის, სახელმწიფოს წინააღმდეგ ნაბიჯებს დგას”, – განაცხადა ირაკლი ზარქუამ.
ცნობისთვის, საქართველოს მესამე პრეზიდენტი მიხეილ სააკაშვილი დაუმორჩილებლობის აქციას გამოეხმაურა და თქვა, რომ მას მიესალმება.
“ჩვენ უნდა შევაგუოთ ისინი რომ არ გადავიხდით ჯარიმებს, უნდა შევაგუოთ ისინი, რომ არ შევასრულებთ შეზღუდვებს, რომელსაც თვითონ არ იცავენ. ჩვენ არ გადავიხდით მათ ჯარიმებს, რომელსაც თავის თავს არ უწერენ. ჩვენ არ შევასრულებთ მათ რეგულაციებს, რომელსაც თვითონ არ იცავენ”,– დაწერა სააკაშვილმა სოციალურ ქსელში.
