უმრავლესობის ერთ-ერთი ლიდერი, მამუკა მდინარაძე ამბობს, რომ არჩევნების ჩატარების თარიღთან დაკავშირებით არანაირ ცვლილებაზე საუბარი არ არის და გამოთქმულ ეჭვებს საფუძველი არ აქვს. თუმცა აღნიშნავს, რომ თუ საგანგებო მდგომარეობის გამოცხადება გახდება საჭირო, არჩევნების თარიღი გადაიწევს.
“თუ კატასტროფული მდგომარეობა იქნება და შეუძლებელი გახდა არჩევნების ჩატარება, ან ძალიან მაღალი ვარაუდი იქნება იმისა, რომ არჩევნების ჩატარება ვირუსის გავრცელების წყარო შეიძლება გახდეს, კონსტიტუციითაა ეს დარეგულირებული და არჩევნები გადაიწევს”,- ამბობს მდინარაზე.
მისივე თქმით, საგანგებო მდგომარეობის გამოცხადების შემთხვევაში, არჩევნები მისი გაუქმებიდან 45-დან 60 დღის ვადაში ჩაინიშნება.
„იმედია, არ დაგვჭირდება საგანგებო მდგომარეობის გამოცხადება და ასეთ შემთხვევაში კონსტიტუციაში გარკვევით წერია, როდის უნდა გაიმართოს არჩევნები და ეს მიმდინარე წლის 31 ოქტომბერია. საგანგებო მდგომარეობის გამოცხადების შემთხვევაში, მისი გაუქმებიდან 45-დან 60 დღის ვადაში ჩაინიშნება არჩევნების თარიღი“, – განაცხადა მამუკა მდინარაძემ.
დღეს დარგობრივი ეკონომიკის კომიტეტის თავმჯდომარემ, რომან კოკულიამ თქვა, რომ “ქართულ ოცნებას” ყველაზე ნაკლებად აწყობს არჩევნების გადაწევა, ამიტომ პირიქით, არჩევნების აქეთ გადმოწევას მიესალმება.
