ვიღაცებს გახარია კერკეტი კაკალი ეგონათ, აღმოჩნდა კერკეტი კვერცხი. ეს არის ერთადერთი ეპითეტი, რომელიც მას მიესადაგება, – ასე უპასუხა ქართული ოცნების თავმჯდომარემ ყოფილი პრემიერის, გიორგი გახარიას დღევანდელ განცხადებას.
მისივე თქმით, გიორგი გახარია სახელმწიფოს ინტერესები წინააღმდეგ მოქმედი ადამიანია.
„ვიღაცებს გახარია კერკეტი კაკალი ეგონათ, ასეთი ტერმინი გამოიყენებოდა, აღმოჩნდა კერკეტი კვერცხი. ეს არის ერთადერთი ეპითეტი, რომელიც მას მიესადაგება. არის 1%-იანი პარტიის ლიდერი და ეს არის საზოგადოების განაჩენი გახარიას მიმართ, რომელიც არის სახელმწიფოს ინტერესების წინააღმდეგ მოქმედი ადამიანი,“ – განაცხადა კობახიძემ.
გიორგი გახარიამ დღეს სპეციალურ ბრიფინგზე განაცხადა, რომ ჩვენს ევროპულ მომავალს დღეს ყველაზე დიდ საფრთხეს ხელისუფლება უქმნის, რომლის პოლიტიკა არც გონივრული, არც ფრთხილი და არც დაბალანსებული უკვე აღარ არის.
„მივმართავ „ოცნებაში“ დარჩენილ ადამიანებს – გადამალული ბიძინა ივანიშვილი თავისი დანაშაულებრივი გეგმის განსახორციელებლად გიყენებთ და თქვენ უნდა გაიაზროთ, რომ ვერც ბიძინა ივანიშვილი გაიპარება უკანა კარიდან და ვერც თქვენ გაიშვერთ ხელს ბიძინა ივანიშვილის მიმართულებით, რადგან ყველას პასუხისმგებლობა იქნება პერსონალიზებული,“ – განაცხადა გახარიამ.
