ამერიკის შეერთებული შტატების ელჩმა, კელი დეგნანმა ფორმულასთან ექსკლუზიურ ინტერვიუში არ გასცა პირდაპირი პასუხი კითხვას, არის თუ არა ბიძინა ივანიშვილი ოლიგარქი და თქვა, რომ ამ კითხვას პასუხი ქართველმა ხალხმა უნდა გასცეს.
“შეერთებული შტატები ვერ იტყვის მასზე ან ვინმე სხვაზე, არის თუ არა ოლიგარქი. ეს ქართველმა ხალხმა უნდა განსაზღვროს. მიდგომა, რომელიც მიჰყვება ძირეულ მიზეზს, რაც არის არასათანადო გავლენა, ფული ან პირადი გავლენა, რაც მოქმედებს პოლიტიკურ, სასამართლო და ოფიციალურ პროცესებზე, არის ის ძირეული რამ, რის მიღწევასაც ეს კანონი უნდა ცდილობდეს. რთულია, მაგრამ ვფიქრობ ეს უმნიშვნელოვანესია. არის სხვა ქვეყნები, რომლებიც ებრძვიან მსგავს გამოწვევას. თითოეულმა ქვეყანამ უნდა მოძებნოს საკუთარი ფორმულა ამ სიტუაციის გადასაჭრელად” – ასე უპასუხა მან ჟურნალისტ სოფო ზურაბიანის კითხვას ივანიშვილის შესახებ. ამავე ინტერვიუში ელჩმა თქვა, რომ მისი და ბიძინა ივანიშვილის მარტში გამართულ შეხვედრაზე არ ყოფილა საუბარი “ქართული ოცნების” დამფუძნებლის სანქცირებაზე ან ფინანსურ გარიგებაზე, რაც შეიძლება მას მიეჩნია შანტაჟად ან საქართველოს ომში ჩართვის მცდელობად.
