უკრაინის სადაზვერვო სამსახურის განცხადებით, კრემლი დემონსტრაციულად სჯის საოკუპაციო ჯარების მეთაურებს უკრაინაში დამარცხებისთვის.
უწყების ცნობით, მომავალი პოლიტიკური და სისხლის სამართლებრივი პასუხისმგებლობის შედეგების შესამცირებლად, კრემლი ცდილობს დააბრალოს ყველა წარუმატებლობა და დამარცხება საოკუპაციო ნაწილებისა და ფორმირებების მეთაურებს. ოკუპანტი ქვეყნის ხელმძღვანელობამ დამნაშავეების ძებნა “საუკეთესო სტალინურ ტრადიციებში“ დაიწყო.
“შავი ზღვის ფლოტის მეთაური, ვიცე-ადმირალი იგორ ოსიპოვი თანამდებობიდან გაათავისუფლეს და დააკავეს რუსეთის შავი ზღვის ფლოტის კრეისერ “მოსკვას” დაკარგვის გამო. საგამოძიებო მოქმედებები ასევე დაიწყო მისი პირველი მოადგილის, ვიცე-ადმირალ სერხი პინჩუკის წინააღმდეგ.
პერსონალის, იარაღისა და სამხედრო ტექნიკის უპრეცედენტო დანაკარგისთვის ვლადისლავ იერშოვი, რომელიც მეთაურობდა რუსეთის ფედერაციის მეექვსე არმიას, მოხსნეს.
იმავე მიზეზების გამო გადააყენეს დასავლეთის სამხედრო ოლქის პირველი სატანკო არმიის მეთაური, გენერალ-ლეიტენანტი სერხი კისელი. “უმაღლესი ხელმძღვანელობის ბრძანების საწინააღმდეგოდ“ გენერალმა მსჯავრდებულები უკრაინის ტერიტორიაზე სადამსჯელო ოპერაციების ჩასატარებლად გაგზავნა.
დასახული ამოცანების არადამაკმაყოფილებელ შესრულებასთან დაკავშირებით, გენერალ-მაიორი არკადი მარზოევი გადააყენეს ყირიმში სამხრეთ სამხედრო ოლქის 22-ე AK-ის მეთაურის თანამდებობიდან.
თანამდებობიდან გაათავისუფლეს ასევე 103-ე ცალკეული ლოგისტიკური ბრიგადის მეთაური მიხაილო პონომარიოვი”,- აცხადებს დაზვერვა.
მათივე შეფასებით, ყველა ეს საჩვენებელი დასჯა მხოლოდ ხელს უწყობს ოკუპანტებში მათი მეთაურების მიმართ უნდობლობის გავრცელებას.
დაზვერვა აცხადებს, რომ რუსეთ-უკრაინის ომის დროს რუსეთის საოკუპაციო ძალებმა ვერ შეასრულეს 23 თებერვალს პუტინის მიერ პათეტიკურად გამოცხადებული სტრატეგიული ამოცანები.
“უძლეველი და ლეგენდარული” არმია აღმოჩნდა მკვლელების, მძარცველების, მოძალადეებისა და მშიშარათა ურდო, რომელსაც ქურდები ხელმძღვანელობდნენ. რუსეთის სამხედრო ხელმძღვანელობის არაკომპეტენტურობამ მსოფლიო საზოგადოების ყოველგვარ მოლოდინს გადააჭარბა”,– აღნიშნავს უკრაინული მხარე.
