ახალი ავტომობილის ყიდვა, რა თქმა უნდა, დიდი სიხარულია. რა თქმა უნდა, ის იაფი არ ღირს, თუმცა ბევრი მზად არის მის შესაძენად კრედიტიც კი აიღოს. მოტივი, რის გამოც ბევრი ამჯობინებს თუნდაც უფრო იაფიანი მარკის, ოღონდ ახალი ავტომობილი იყიდოს, და არა იგივე ფასად მეორადი უფრო ძვირადღირებული მოდელი, სხვადასხვაა. არსებობს სხვადასხვა არგუმენტი, რის გამოც ადამიანები ახალი ავტომობილის ყიდვას ამჯობინებენ. თუმცა ბევრი მათგანი უბრალოდ წლების მანძილზე დამკვიდრებული მითია. გთავაზობთ რამდენიმე მითს, რომელსაც ყველაზე ხშირად გაიგებთ ავტომობილის ავტოსალონში შეძენის მომხრეებისგან:
- ახალი მანქანა არ ფუჭდება და რემონტზე ფულს არ დავხარჯავ
ნუ იქნებით ასე დარწმუნებული, რომ ფულს დაზოგავთ. პრობლემა ახალ მანქანასაც შეიძლება აღმოაჩნდეს. როგორც წესი, ქარხნული დეფექტები მართალია იშვიათა, მაგრამ მაინც, ექსპლუატაციის პირველ წელს ვლინდებახოლმე. საგარანტიო რემონტის დეტალები კი თუ წინასწარ არ გაარკვიეთ, შესაძლოა ამ მხრივ სიურპრიზების წინაშე აღმოჩნდეთ. საგარანტიო პირობები, როგორც წესი გეგმიურ ტექმომსახურებასაც გულისხმობს, რაც აუცილებლად სერთიფიცრებულ სერვისცენტრში უნდა გაიაროთ, და შესაბამისი საბუთიც მიიღოთ. მაგალითად, ზეთის შეცვლა დადგენილ დროს და დადგენილ მანძილზე. აქ ფასები ორჯერ–სამჯერ უფრო მაღალია, ვიდრე ჩვეულებრივ სახელოსნოებში, თუმცა თქვენ არჩევანი არ გაქვთ, წინააღმდეგ შემთხვევაში გარანტიას დაკარგავთ. შესაბამისად, გაითვალისწინეთ, რომ ახალ მანქანას საკმაო ხარჯებიც მოყვება.
- გარანტია
რახან გარანტია ვახსენეთ, აქვე გარანტიასთან დკავშირებულ მითზე მოგიყვებით. ყოველი მწარმოებელი მყიდველის წინაშე გარკვეულ საგარანტიო ვალდებულებებს იღებს, რაც ახალი ავტომობილის მფლობელს ზოგჯერ უქმნის ილუზიას, რომ ყველა პრობლემისგან დაზღვეულია. თუმცა, როგორც წესი, საგარანტიო პირობები სხვადასხვა ნიუანსს შეიცავს. ზოგადი დათქმა თითქმის ყველგან სტანდარტულია: 3 წელი ან 100 ათასი კილომეტრის გარბენი. თუმცა, ეს ყველაფერი შეიძლება მხოლოდ ლამაზი ციფრები აღმოჩნდეს.
რეალობაში, ყველა მწარმოებელს აქვს მთელი რიგი შეზღუდვებისა ვადებში და კილომეტრაჟში დეტალების მთელ დიაპაზონზე. მაგალითად, სამუხრუჭე სისტემაზე, გაგრილების სისტემაზე და ა.შ.
ამიტომაც, ნუ მოგერიდებათ დეტალურად გაარკვიოთ, რაზე ვრცელდება საგარანტიო მომსახურება და რა დეტალებზე ან მომსახურებაზე არის შეზღუდული, ან საერთოდაც არ ვრცელდება.
ავტორუბრიკას წარმოგიდგენთ სოკარი
- ახალი ავტომბილი ხელსაყრელი ინვესტიციაა
ახალი ავტომობილის ყიდვისას ბევრი დარწმუნებულია, რომ საჭიროების შემთხვევაში მას იგივე ფასად გაყიდის და ამისათვის მხოლოდ ის არის საჭირო, რომ მანქანას მოუარო და ტექნიკურად გამართული იყოს. სინამდვილეში ეს მითია. ყიდვის შემდეგ, როგორც კი ავტოსალონს დატოვებს, მანქანა მაშინვე კარგავს ღირებულების გარკვეულ პროცენტს. თუნდაც სულ რამდენიმე ათასი კილომეტრი გაიაროთ, მანქანას უკვე მეორადის სტატუსი აქვს და არა ახლის.
ახალი ავტომობილი ღირებულებას ყოველთვიურად კარგავს, მიუხედავად იმისა, როგორ უვლით მას ან რა დამატებითი კომფორტით ან ტექნიკით–მაგალითად ძლიერი დინამიკებით ან უსაფრთხოების თანამგზავრული სისტემით გაამდიდრებთ. ექსპლუატაციის პირველ წელს მოდელი ნებისმიერ შემთხვევაში დაახლოებით 15–20%–ით იაფდება. ასე რომ, ფულის დაბანდების მიზნით ახალი ავტომობილის ყიდვა არაეფექტურია.
- ახალ მანქანას არანაირ ნაკაწრი არ ექნება და არც “გადაღებილია“
ახალ და მეორად ავტომობილს შორის არჩევანის გაკეთებისას ბევრი მყიდველი არჩევანს ახალზე იმის გამო აკეთებს, რომ დარწმუნებულია, მანქანა, რომელსაც 0 კილომეტრი აქვს გავლილი, არც დაზიანებულია და არც შეღებილი. თუმცა, ასეთი ლოგიკა მცდარია. ახალი ავტომობილები ხშირად იღებენ დაზიანებას გადაზიდვისას ერთი ქვეყნიდან ან კონტინენტიდან მეორეში. მისი დაზიანება არა მხოლოდ გადაზიდვისას, არამედ საწყობშიც კი შესაძლებელია, რადგან აქ ერთმანეთის გვერდით ბევრი მანქანაა.
შესაძლოა სადილერო ცენტრის თანამშრომლებმა დეფექტები ოპერატიულად გამოასწორონ და ეს მომხმარებელს დაუმალონ. მაგალითად, დაზიანებული ადგილები გაასწორონ და ნაკაწრები შეღებონ.
ასე რომ, თუ მეორადი ავტომობილის ყიდვისას მას დეფექტებზე ამოწმებთ, იგივე არც ახლის ყიდვისას იქნებოდა ცუდი. სალონში ნაყიდი ავტომობილი არ ნიშნავს, რომ მას არანაირი დაზიანება არ ქონია.
ეს არის მოკლე ჩამონათვალი იმ მითებისა, რომლებიც ზოგჯერ რეალობას არ შეესაბამება. რა თქმა უნდა, ახალი მანქანა კარგი შენაძენია, თუმცა მისი ყიდვისას ჯობს ბევრი ნიუანსი და რეალობა გაითვალისწინოთ.
