გორის მუნიციპალიტეტის მერის ორმა მოადგილემ – ერასტი ელიჯარაშვილმა და პაატა ივანიშვილმა თანამდებობები დატოვეს და გახარიას გუნდს შეუერთდნენ. მათი თქმით, პოსტების დატოვება აიძულეს.
„მინდა გავაკეთო განცხადება და გაცნობოთ, რომ პირდაპირ გვთხოვენ თანამდებობის დატოვებას. თანამდებობა ჩვენი თვითმიზანი არ არის და ვტოვებთ ამ თანამდებობებს. მმართველ პარტიას კი მინდა ვუთხრა, რომ ხელი არ დააკარონ მერიის თანამშრომლებს, საჯარო მოხელეებს, რომელთა სიაც უკვე აქვთ და აპირებენ მათ გაშვებას. ჩვენ, გორელებს, გორს დავეხმარებით გიორგი გახარიას გუნდთან ერთად. ვემზადებით თვითმმართველობის არჩევნებისთვის, სადაც აუცილებლად გავიმარჯვებთ“, – განაცხადა ერასტი ელიჯარაშვილმა.
ანალოგიური განცხადება გააკეთა გორის მერის კიდევ ერთმა მოადგილემ, პაატა ივანიშვილმა.
„დაჟინებით მოითხოვენ, დავტოვოთ თანამდებობა. ჩვენ დავტოვებთ თანამდებობებს, უბრალოდ, ერთი რამ მინდა ვუთხრა ჩემს თანაქალაქელებს, ჩემს გორელებს – ჩვენ ვრჩებით თქვენს სამსახურში, თქვენს გვერდით, ჩვენ ვუერთდებით ბატონ გიორგი გახარიას გუნდს, მივიღებთ ადგილობრივი თვითმმართველობის არჩევნებში მონაწილეობას, სადაც გავიმარჯვებთ“, – განაცხადა პაატა ივანიშვილმა.
გახარიას გუნდმა ქართული ოცნება მათ მხარდამჭერებზე ზეწოლაში 27 აპრილს დაადანაშაულა.
