იტალიაში, სადაც კორონავირუსის 132 000–ზე მეტი შემთხვევაა დარეგისტრირებული, სახლიდან გამოსვლისას დამცავი ნიღბის ტარება სავალდებულო გახდა.თავიდან ეს ზომა ლომბარდიის რეგიონში შემოიღეს, შემდეგ კი სხვა რეგიონებშიც გავრცელდა.
ტოსკანაში ნიღბის ტარება სავალდებულო ამ კვირის დასაწყისიდან გახდა.
ეკონომიკის ძარავა იტალიაში რამდენიმე კვირის წინ გამოირთო ეპიდემიის გავრცელების თავიდან ასაცილებლად, თუმცა ადრე თუ გვიან მისი დაქოქვა ქვეყანას ისევ მოუწევს.
ხელისუფლება ვარაუდობს, რომ აღდგენისთვის 700 მილიარდ ევროზე მეტი იქნება საჭირო.
ძირითად ზომებზე და მათთან დაკავშირებულ თანხებზე მინისტრთა კაბინეტის მეთაურმა, ჯუზეპე კონტემ განაცხადა.
“როცა საჭიროა ქვეყნის და მისი ინტერესების დაცვა, ჩვენ თანხებზე უკან არ დავიხევთ. და მართალია იცით, რომ პროგნოზებში საერთოდ ფრთხილი ვარ, მაგრამ დარწმუნებული ვარ, რომ საბოლოო ჯამში ისტორია აღიარებს ჩვენს მიერ მიღებული გადაწყვეტილებების სისწორეს“– თქვა მან.
ესპანეთში კი, სადაც დაინფიცირებულთა რიცხვი 140 000–ს უახლოვდება ყველაზე მეტად ეპიდემიისგან დედაქალაქის რეგიონი დასახელდა. კარანტინი ქვეყანაში აპრილის ბოლომდე გაგრძელდა.
ესპანეთის ანკლავ მელილში, რომელიც ჩრდილოეთ აფრიკაში მდებარეობს, ასამდე მიგრანტმა სასაზღვრო ნაგებობები გადალახა, რადგან აქ სამართალდამცავთა რიცხვი შემცირებულია. კონტინენტურ ესპანიას პოლიციის გაძლიერებული ძალები ჭირდება, რათა იზოლაციის ზომების დაცვა აკონტროლოს.
საფრანგეთში კი ხელისუფლება კოლოსალურ ძალისხმევას ხარჯავს ვირუსის გამოსავლენად: იწყება ხანდაზმულთა, ინვალიდობის მქონე პირთა და მოხუცებულთა თავშესაფრის პერსონალის დიაგნოსტიკა. საფრანგეთის ჯანდაცვის სამინისტრო აცხადებს, რომ ჯერჯერობით ეპიდემიის საბოლოოდ დაძლევა ვერ მოხერხდა: ინფექციით ყველაზე მეტად მოცულ ელზასში მის პიკს აპრილის ოცი რიცხვისთვის ელიან.
საფრანგეთში ბოლო დღეღამეში ამ ქვეყნისთვის 24 საათის განმავლობაში გარდაცვლილთა რეკორდული მაჩვენებელი – 1417 დაფიქსირდა. დაინფიცირებულია 109 000–ზე მეტი ადამიანი.
