ჟურნალისტი ნოდარ მელაძე მიანიშნებს, რომ ბათუმში, 26 მაისის ქუჩაზე ექვსსართულიანი კორპუსის ნგრევა, რომელსაც 9 ადამიანი ემსხვერპლა შესაძლოა ბათუმის შესაბამისი სამსახურების პასუხისმგებლობის ბრალი იყოს.
“ჯიბეში ჩაკუჭული დოლარებით მოგვარებული ნგრევის ნებართვების და უნებართვო დემონტაჟის გამო, ჩამონგრეული კორპუსის კადრს ვუყურებთ.
პასუხისმგებელი პირი თურმე მარტო ფართს მფლობელი ყოფილა, რომელიც დააკავეს და მასთან ერთად არა ზედამხედველების სამსახური, რომელსაც ხალხი ფულს სწორედ ამ უკანონობის გასაკონტროლბელად უხდის.
ახლა ხო სხვა რამეზე უნდა გადაიტანონ ყურადღება, ახლა ხომ კითხვა არ უნდა დაისვას, პარლამენტის წევრის ძმისშვილმა რომელსაც ამის კონტროლი ევალებოდა ბათუმში, შემთხვევით ვინმეს ზარის გამო ხომ არ დახუჭა თვალი?
შემთხვევით ვინმემ ხომ არ მოაგვარა, რომ ბინის შიდა ტიხრების ნგრევა არ შეემჩნიათ და გაემწვანებინათ?
ამ დროს მთავარი თემა ფბ-ზე თურმე ჟურნალისტის სიქნრონი ყოფილა.
განვმარტავ:
ჟურნალისტმა თეკლა ტაბატაძემ, დილით ადრე, დაუსვა კითხვა, ნანგრევებიდან ამოყვანილი და გადარჩენილი ქალის ინგა მეკეიძის მეუღლეს, რომელიც სამაშველო ოპერაციას ეზოდან აკვირდებოდა და მეუღლის გადარჩენის შემდეგ ნანგრევებიდან შვილების ამოყვანას ელოდა.
ინტერვიუ ჩაწერილია დილით, როგორც გადარჩენილი ქალის მეუღელსთან, ამ ინტერვიუს ჩაწერიდან ერთ საათის შემდეგ გაავრცელა კლინიკამ ინფორმაცია რომ ინგას გადარჩენა ვერ შეძლეს.
იგივე ადამიანის ინტერვიუს ქალის ნანგრევებიდან ამოუყვანის შემდეგ, ყველა არხის პირდაპირ ეთერში გადავცემდით.“– წერს ნოდარ მელაძე ფეისბუქზე.
ბათუმში, 26 მაისის ქუჩაზე საცხოვრებელი კორპუსის ერთი სადარბაზო გუშინ ჩამოინგრა. ნგრევას 9 ადამიანი ემსხვერპლა, აქედან 4 ერთი ოჯახის წევრია. რაც შეეხება 36 წლის მამაკაცს, რომელიც მაშველებმა კორპუსის ნანგრევებიდან გუშინ, რამდენიმე საათიანი სამძებრო სამუშაოების შემდეგ ამოიყვანეს, კლინიკაშია მოთავსებული და მისი მდგომარეობა მძიმეა. ასევე მაშველებმა გადაარჩინეს არასრულწლოვანი, რომელიც ნგრევის დროს მანქანაში იმყოფებოდა.
შინაგან საქმეთა სამინისტრომ მომხდარ ფაქტზე 3 პირი დააკავა. უწყების ინფორმაციით, ბათუმში, კორპუსის პირველ სართულზე ერთ-ერთი ბინის მესაკუთრის მითითებით სარემონტო სამუშაოები განხორციელდა, რამაც სადარბაზოს ჩამონგრევა გამოიწვია. დაკავებულია ბინის მეპატრონე და ორი მუშა.
გუშინ ცნობილი გახდა, რომ ბათუმის რეესტრმა ფართის მესაკუთრის მოთხოვნა სარდაფისა და პირველი სართულის გაერთიანების შესახებ შენობის ჩამონგრევის შემდეგ დაახარვეზა. სავარაუდოდ კომერციული ფართის მოწყობის პროცესში მესაკუთრემ კორპუსის საყრდენი კედლები თვითნებურად მოანგრია, თუმცა არ არის გამორიცხული, რომ მას მერიის ნებართვაც ჰქონდა.
სოციალურ ქსელებში მოქალაქეების ნაწილი მედიას ტრაგედიის გაშუქების გამო საყვედურობს. მათი აზრით მედია გარდაცვლილთა ოჯახების ტრაგედიას ჟურნალისტური ეთიკის წესების დარღვევით აშუქებს.
