რელიგიის ექსპერტთა ასოციაციის ინფორმაციით, 11 თებერვალს, სინოდის სხდომაზე, კათოლიკოს-პატრიარქ ილია მეორის ტახტიდან გადაყენებას განიხილავენ.
“კონფიდენციალურ წყაროებზე დაყრდნობით, გაცნობებთ, რომ ხუთშაბათს, 11 თებერვალს წმინდა სინოდის საგანგებო სხდომა გაიმართება, რომლის ფორმატშიც, რუსეთის ეკლესიის მესვეურთა დავალებითა და რუსოფილურად განწყობილ ქართველ ეპისკოპოსთა გარკვეული ჯგუფის შეთქმულებით ძირეული საეკლესიო ძვრების განხორციელება იგეგმება, კერძოდ – ახალი წესრიგისა და მმართველობის დამკვიდრება, რომელიც გულისხმობს კათოლიკოს-პატრიარქ ილია II-ის ტახტიდან გადაყენებას გარკვეული კომპრომატებისა თუ შანტაჟირების მეშვეობით და დაჩქარებული წესით პირველიერარქის არჩევნების დანიშვნას, რაც საპატრიარქო ტახტის მოსაყდრე შიოს მოკლე ვადებში მწყემსმთავრად დადგინებას ემსახურება. ამასთან, ჩვენი ინფორმაციით, იმისათვის, რათა კრემლის განზრახვა სრულყოფილად განხორციელდეს, აღნიშნული მზაობის ხელშეწყობისათვის იგეგმება დამატებითი საეპისკოპოსო კანდიდატების გამორჩევა, რომელნიც საწყისშივე მოტივირებული მისიით იმოქმედებენ რუსეთის გავლენის კიდევ უფრო გაძლიერებისათვის სინოდში”
რელიგიის ექსპერტთა ასოციაცია მოუწოდებს მიტროპოლიტ შიოს, დატოვოს მოსაყრდის თანამდებობა.
“ეს არის რუსეთის მიერ ერთგვარი შურისძიება მიტროპოლიტ გერასიმეს (შარაშენიძე) მიერ რუსეთის ეკლესიისათვის საპროტესტო ნოტის გაგზავნის გამო, რაც პატრიარქის კურთხევით განხორციელდა. ჩვენი ძალისხმევით ამ წერილმა საერთაშორისო გამოხმაურება ჰპოვა, რამაც რუსეთის საპატრიარქო დიდად გააღიზიანა…
აგრეთვე, შექმნილი ვითარებიდან გამომდინარე, პასუხისმგებლობის მაღალი სტანდარტის გათვალისწინებით, მოვუწოდებთ მიტროპოლიტ შიოს – ნებაყოფლობით დატოვოს საპატრიარქო ტახტის მოსაყდრის თანამდებობა და თავიდან აარიდოს დედა-ეკლესიას მოსალოდნელი საფრთხეები და ინტრიგები, რომლის თანამონაწილეც წინააღმდეგ შემთხვევაში თავადაც გახდება”
თეოლოგები ამბობენ, რომ საპატრიარქოზე რუსული გავლენები იზრდება, ამ პირობებში კი ილია მეორის გადაყენება და მეუფე შიოს დაჩქარებული წესით აღსაყდრებაა დაგეგმილი.
“პატრიარქის იძულებით გადაყენება სავარაუდო კომპრომატების გამოყენებით მოხდება და შემდეგ საზოგადოებას ისე წარმოუჩენენ, თითქოს, პატრიარქი საკუთარი ნებით, ჯანმრთელობის გამო გადადგა საპატრიარქო ტახტიდან. ეს არის რუსეთის ეკლესიის შურისძიება, გვახსოვს ჩვენ მეუფე გერასიმემ საპროტესტო წერილი გაუგზავნა რუსეთის ეკლესიას, მათ მიერ ცხინვალში ოკუპირებულ ტერიტორიაზე, ჩვენს ტერიტორიაზე შემოჭრის გამო, და ამან საერთაშორისო გამოხმაურება მოჰყვა რის გამოც რუსები გაღიზიანნენ. მეუფე შიო რომ პატრიარქი გახადონ ესაჭიროებათ დამატებითი ხმები და ამის გამო აპირებენ სხვა მღვდელმთავრები გამოარჩიონ. ერთ-ერთი ვინც უნდა გამოარჩიონ გახლავთ, არქიმანდრიტი კირიონ ონიანი, რომელსაც საპატრიარქო დაუფასებს დიდ “ღვაწლს” – ამბობს ასოციაციის თავმჯდომარე, ზვიად ცაბაძე.
