რუსეთის მოლაპარაკებების ჯგუფის ხელმძღვანელი ვლადიმირ მედინსკი ამბობს, რომ რუსეთი მზადაა უკრაინასთან მოლაპარაკებების გასაგრძელებლად, მისი გაყინვის ინიციატივა კი კიევიდან მოდის.
“ჩვენი მხრივ, მზად ვართ, გავაგრძელოთ დიალოგი. მაგრამ კიდევ ერთხელ ხაზს ვუსვამ: სამშვიდობო მოლაპარაკებების გაგრძელების ბურთი უკრაინის მხარესაა. მოლაპარაკებების გაყინვა მთლიანად უკრაინის ინიციატივაა. რუსეთს არასდროს უთქვამს უარი მოლაპარაკებებზე, მათ შორის უმაღლეს დონეზე. ვლადიმერ ვლადიმიროვიჩ პუტინმა არაერთხელ დაადასტურა ეს. ერთადერთი საკითხია, რომ პრეზიდენტებს შორის შეხვედრისთვის სერიოზული მომზადებაა საჭირო”, – განაცხადა მედინსკიმ რუსული მედიის ცნობით.
მისი განმარტებით, სახელმწიფოს მეთაურები უნდა შეიკრიბონ, რათა საბოლოო შეთანხმებებს მიაღწიონ და ხელი მოაწერონ დოკუმენტებს და არა ფოტოების გადასაღებად.
მედინსკიმ აღნიშნა, რომ ერთი თვის წინ რუსეთმა უკრაინულ მხარეს გადასცა ხელშეკრულების პროექტი, რომელშიც უკვე შეთანხმებული იყო რამდენიმე ფუნდამენტური პოზიცია, თუმცა მას შემდეგ უკრაინის მხრიდან დიალოგის გაგრძელების სურვილი არ გაჩენილა.
უკრაინის მომლაპარაკებელთა ჯგუფის წევრი, მიხაილო პოდოლიაკი ამბობს, რომ რუსეთთან მოლაპარაკება დღეს შეუძლებელია, რადგან “ისინი კვლავ თავიანთ პროპაგანდაში ცხოვრობენ”. მისივე განმარტებით, რუსეთს ჯერ კიდევ არ ესმის ომის შედეგები და აქვს ილუზია, რომ შესაძლოა მიაღწიოს სამხედრო წარმატებას აღმოსავლეთ უკრაინაში.
