იმ დროს, როდესაც პანდემიის ფონზე მსოფლიოს პოლიტიკური და ჯანდაცვის ლიდერები სახლში დარჩენისკენ, კონტაქტებისა და გადაადგილების შეზღუდვისკენ მოგვიწოდებდნენ, სანამ თითქმის მთელი მსოფლიო კარანტინში ჩაიკეტა, საინტერესოა რას აკეთებდნენ მსოფლიოს ზემდიდარი ადამიანები და როგორ ცდილობდნენ თავის დაცვას მოსალოდნელი საფრთხეებისგან.
პანდემიის გამოცხადებასთან ერთად გაჩნდა არაერთი ინფორმაცია იმის თაობაზე, თუ როგორ ცდილობდნენ სუპერმდიდარი ადამიანები საიმედო თავშესაფრის მოძებნას ეკონომიკური კატასტროფის და სოციალური მღელვარების შემთხვევაში თავის დასაცავად.
მიწისქვეშა ბუნკერები სასაიცოცხლო უზრუნველყოფის სისტემებით, მიუდგომელი ციხე სიმაგრეები და კუნძულები – ეს მხოლოდ ნაწილია იმ წინადადებებისა, რომლებიც ამ ბაზარზე არსებობს.
უძრავი ქონების აგენტები ამბობენ, რომ ბოლო თვეებში განსაკუთრებით გაიზარდა მოთხოვნა ბუნკერიან, ან მიწისქვეშა სახლებზე, ასევე ძალიან პოპულარული გახდა კუნძულების შეძენა.
ამერიკული უძრავი ქონების კომპანიის მფლობელი, ჰარი ლინჩი ამბობს:
“აშშ ეკონომიკის თვალსაზრისით ძალიან რთულ სიტუაციაში აღმოჩნდა, და თუ ჩამოშლა მოხდებოდა, ჩვენ ალბათ მომსწრენი გავხდეობით სამოქალაქო არეულობის და სოციალური მღელვარების. ასეთ დროს ბრბო შეიძლება სახლებსაც შეესიოს და დააზიანოს, ან გაძარცვოს.
საკვებიც კი მოიტაცოს, ან რამე უფრო ძვირფასი და ა.შ. ამიტომაც ბევრმა ჩემმა კლიენტმა მოინდომა მიწისქვეშ დამალვა, რომ მშვიდად ყოფილიყვნენ და არ ენერვიულათ იმასთან დაკავშირებით, თუ რა ხდებოდა გარეთ. ისეთ თავშესაფარს ეძებდნენ, სადაც დაცულად იგრძნობდნენ თავს.
ბაზარზე არსებობს ასეთი შეთავაზებები. მაგალითად, მიწისქვეშა სახლი, ტყვიაგაუმტარი კარით, სპეციალური რადიაციისა და დაავადებებისგან დამცავი ფილტრებით, გვაქვს ასეთი სახლი თავშესაფარი – 600 კვადრატული მეტრის სუპერბუნკერი. ორი სამზარეულოთი, დიდი მთავარი სასადილოთი, სასტუმრო ოთახი 60 კვადრატული მეტრია, 100 კვადრატულ მეტრიანი სათბურიც არის სახლში. მიწისქვეშა ტირიც არის გასართობად. ამ კომპანიის მიერ მოწყობილი ბუნკერების ფასი 50 000 დოლარიდან იწყება.
ბრიტანული უძრავი ქონების კომპანიის წარმომადგენელი, პენი მასგროუვი ამბობს, რომ მათი კლიენტები ძირითადად კომპანიების დამფუძნებლები და მფლობელები, ცნობილი ადამიანები და ტოპ მენეჯერები არიან. რომლებსაც მთელ მსოფლიოში რამდენიმე სახლი აქვთ.
“გვქონდა მოთხოვნები შოტლანდიის მაღალმთიანეთში მდებარე ციხე–სიმაგრეებზე, ბუნკერებიან სახლებზე, რაც სხვათაშორის ბაზარზე ბევრი არ არის.
ერთმა კლიენტმა, რომელსაც ლონდონში, მეიფერში უზარმაზარი, 40 მილიონ დოლარად ღირებული სახლი აქვს, რომლის გადაკეთებაც სულ ახლახანს დაასრულეს, კიდევ ერთი, სათადარიგო სახლი მოინდომა მეიფერში,ზუსტად თავისი ახალი სახლის მეზობლად, რადგან მის ძვირფას სახლს არ უნდოდა კორონავირუსი გაკარებოდა.
იყო მოთხოვნები მივარდნილ ადგილებში მდებარე სახლებზე, ან თხრილებით გარშემორტყმულ სახლებზე. დიდი მოთხოვნა გაჩნდა შოტლანდიურ სახლებზე, პოპულარული გახდა კუნძულებიც. აღმოვაჩინე, რომ პანდემიის დროს კუნძულებზე დიდი მოთხოვნა ჩნდება.“– ამბობს ის.
