კომპანია „დიო“-ს თანადამფუძნებელი და აღმასრულებელი დირექტორი თამაზ დაუშვილი ბიზნესისთვის საგანგებო მდგომარეობის დროს შექმნილი პრობლემების შესახებ ფეისბუქზე წერს:
“მთავრობამ 31 მარტს გააჩერა ეკონომიკა, მხოლოდ 70-მდე კომპანიას მისცა მუშაობის გაგრძელების უფლება, დღემდე გაუგებარია კონკრეტულად რა კრიტერიუმებით შეარჩიეს ეს კომპანიები; 1 კვირის დაგვიანებით გამოაქვეყნა რეგისტრაციის მექანიზმი იმ კომპანიებისათვის, რომლებსაც მუშაობის გაგრძელების სურვილი ექნებოდათ, ასობით კომპანიამ შეიტანა განაცხადი, შეამოწმეს ბევრი კომპანია, მათმა 80%-მა დააკმაყოფილა ყველა კრიტერიუმი, თუმცა არცერთ მათგანს დღემდე არ მისცემია მუშაობის გაგრძელების უფლება. გუშინ კი ვიგებთ, რომ თურმე კომპანიების რეგისტრაციის ახალი მექანიზმი შეუმუშავებიათ და ახლა ამ გზით უნდა ვეცადოთ მუშაობის გაგრძელების უფლების მოპოვება. ამასობაში გავიდა მთელი აპრილის თვე. ახლა მითხარით, როგორ უნდა გადაიხადონ კომპანიებმა აპრილის თვის ხელფასები, როცა მათი შემოსავალი არის 0 ლარი?
P.S. თურმე აქვე ირკვევა, რომ მთავრობის 200 ლარიანი კომპენსაციის გაცემის ათვლა ბევრი კომპანიის მაგალითზე პრაქტიკულად იწყება მხოლოდ მაისიდან. აქაც ცინიზმი: ადამიანებს მარტი-აპრილიდან შემოსავლის მიღების საშუალება მოუსპე და საშუალო ხელფასზე 5-ჯერ ნაკლებ თანხას აძლევ, ისიც მხოლოდ მაისიდან.“– წერს ბიზნესმენი.
