რუსეთის მინისტრთა კაბინეტმა რუსეთის მიმართ “არამეგობრული” ქვეყნების სია დაამტკიცა, მათ შორის საქართველო არ არის.
რუსეთის განმარტებით, სიაში მოხვდნენ ქვეყნები, რომლებიც სჩადიან არამეგობრულ ქმედებებს რუსეთის, მისი კომპანიებისა და მოქალაქეების მიმართ – დააწესეს ან შეუერთდნენ რუსეთის წინააღმდეგ სანქციებს უკრაინაში შეჭრის შემდეგ.
რუსეთის სამთავრობო მედიის, TASS-ის ცნობით, შესაბამისი ბრძანება დღეს, 7 მარტს დამტკიცდა.
არამეგობრული ქვეყნების სიაში მოხვდნენ: აშშ, კანადა, ევროკავშირის ქვეყნები, დიდი ბრიტანეთი, უკრაინა, მონტენეგრო, შვეიცარია, ალბანეთი, ანდორა, ისლანდია, ლიხტენშტეინი, მონაკო, ნორვეგია, სან-მარინო, ჩრდილოეთ მაკედონია, ასევე იაპონია, სამხრეთ კორეა, ავსტრალია, ახალი ზელანდია, სინგაპური და ტაივანი.
